Nahemotra ny fitsarana an’i Perle Zafinandro

03/04/2013

Fanindroany izao no tsy tanteraka ny fitsarana ny filohan’ny fikambanana Fagnomba, Perle Zafinandro. Ity farany enjehin’ny orinasa Fasimainty teo anatrehan’ny fitsarana ambaratonga voalohany any Tolagnaro noho ilay raharaha fanakanan-dalana tao amin’ny 4 chemins Bezavona-Mandena. Ny tsy fahatongavan’ity mpisolovava ny mpitory no voalaza fa antony nanemorana ny fitsarana ho amin’ny 30 avrily. Tonga maro nanontrona ny filohan’ny fikambanana tao amin’ny lapan’ny fitsarana kosa ireo mpikambana amin’ny Fagnomba. Naverina eny am-ponja i Perle Zafinandro, filohan’ny fikambanana Fagnomba any Tolagnaro, taorian’ny tsy nahatanterahan’ny fitsarana azy izay tokony natao omaly tany an-toerana.

Araka ny nambaran’ny mpitsara avy ao amin’ny fitsarana ambaratonga voalohany any Tolagnaro izay niandraikitra an’ity raharaha ity dia amin’ny faha 30 avrily izao indray no hiakatra fitsarana fanintelony ity filohan’ny fikambanana Fagnomba ity. Raha tsiahivina dia ilay fihetseham-bahoaka notarihan’ny fikambanana Fagnomba ka nisian’ny sakan-dàlana teo amin’ny 4 chemin tao Bezavona Mandena, làlana mihazo ny foiben’ny orin’asa QMM no iray amin’ireo raharaha mahavoaroiroy an’ity mpitarika ny hetsiky ny fikambanana Fagnomba ity, ankoatra ilay raharaha famakiana ny biraon’ny CENIT tao amin’ny lapan’ny Faritra any Anôsy. Tonga teny amin’ny fitsarana ambaratonga voalohany tany Tolagnaro ny filohan’ny Fagnomba tamin’io omaly io. Tonga niatrika ny fitsarana ihany koa ny solon-tenan’ny mpitory. Saingy ty tonga kosa ny mpisolovava ny mpitory. Antony nahatonga ny fitsarana hanapa-kevitra hanemotra ny raharaham-pitsarana. Tetsy an-danin’izany anefa, hita taratra ihany koa fa isan’ny nahatonga ny fanampahan-kevitry ny mpitsara hanemotra ny fitsarana tamin’io omaly io ny fihetsika nataon’ireo avy amin’ny fikambanana Fagnomba izay tonga maro dia maro tao amin’ny trano fitsarana nanontrona ny filohan’izy ireo. Mazava loatra fa sarotra dia sarotra ny fampanginana an’ireo vahoaka tao anatin’ny trano fitsarana izay nahatonga ny mpitsara hampaka-peo mihintsy tamin’ny fotoana sasany.
Nanana ny fahitany an’ity raharaha ity ireo avy amin’ny fikambanana Fagnomba izay nanontanian’ny mpanao gazety taorian’ny fanemorana ny fitsarana omaly. Nambaran’izy ireo fa mahatoky tanteraka ny fahendren’ny fitsarana izy ireo amin’ity raharaha ity. Tsara ny manamarika fa ilay raharaha fahavakisan’ny tranon’ny CENI-T any an-toerana no mbola itazomanana an’I Perle Zafinandro eny amin’ny fonja amin’izao fotoana izao. Mahakasika ity raharaha fahavakisan’ny CED ity dia efa vita ny fankana ambavany ireo olona izay nahiahiana amin’izany. Tsy mbola fantatra kosa ny fotoam-pitsarana. Farany mbola isan’ny arahan’ny mpanara-baovao maro any Tolagnaro ihany koa ny mahakasika ny raharaha Rasolodrainy Armand izay isan’ny nahemotra amin’ny datin’ny faha 30 avrly ihany koa. Ny orinasa QMM ihany koa no mitondra ity raharaha ity eny anivon’ny fitsarana.