Tsy naresaka ny fetin’ny Paska

03/04/2013

Olona enina no voasambotra noho izy ireo tsy nanana karapanondrom-pirenena, na nanakorontana na koa nanao fiantsiana sy nanompa mpitandro filaminana. Moto scooter miisa enina kosa no nogiazana ary roa ny lozam-pifamoivoizana: moto scooter tao Ambolomadinika ny iray ary cyclo-pousse teo amin’ny “gare routiere” ny faharoa, tsy nisy aloha ny maty fa ny naratra sy fananana simba no betsaka. Ankoatr’ireo dia olona 02 no voahendaka ny alin’ny alatsinainy teo bazary kely sy tao Ambolomadinika. Ireo, amin’ny ankapobeny, no isan’ny tatitra nataon’ny mpitandro filaminana avy ao amin ‘ny polisim-pirenena tany Toamasina mikasika ny fanamarihana ny andron’ny Paska amin’ny ankapobeny tany an-toerana, indrindra ny alatsinainin’ny Paska.

“Nilamina ny fetin’ny paska raha ny hitanay, tsy nisy loatra ny tena olana goavana, izahay koa niezaka nameno ny tanana sy ireo toerana be olona ary ireo faritra nisy hetsika samy hafa”, hoy indrindra ny kaomisera Ramananandro Gabriel, lehiben’ny servisin’ny kaomisarian’i Toamasina I izay namintina ny fahitany iny fety iny.
Ny tena nanaitra dia maro ny talata maraina ireo olona nanao filazana zavatra very tonga tao amin’ny kaomisarian’i Toamasina I. Niisa 38 izany rah any omaly maraina fotsiny raha voalaza fa manodidina ny 60 ka hatramin’ny 70 isan’andro ny olona manao fangatahana fanamarinana fahaverezana. Ny ankamaroany, araka ny fanadiadiana natao dia ny fahaverezana “puce” finday, na kara-panondro na koa “carte bancaire”. Voamarika anefa fa haro-paosy avokoa no mahatonga izany, ka ny Bazary kely sy Ambolomadinika ary ny Bazarin’Ankirihiry no tena nitrangany.
Ankoara izay, tsy naresaka ny fetin’ny paska tao Toamasina, antony telo no nahatonga izany araka ny angom-baovao natao: teo aloha ny tsy fisian’ny vola tamin’ireo fianakaviana maro izay nisafidy ny hijanona tao an-trano sy nanao fety an-tokantrano. Teo koa ny fiasian’ireo mpintandro ny filaminana nanerana ny tanana ary ny fahavian’ny orana izay naha-feno ny faritra maro tao Toamasina.