Hiatrika fivoriambe manomboka anio

03/04/2013

Hifamontoana any Toamasina amin’ny alalan’ny fivoriambeny, anio sy rahampitso ny fikambanana Vondron’ny mira lenta ho an’ny fampandrosoana” na ny VMLF manerana ny nosy. Solontena sady mpikatroka miisa 1.000 mahery avy amin’ny faritra 22 manerana ny Nosy no handray anjara amin’izany fivorian-dehibe izany.

Araka ny fanazavana avy amin’ny ireo mpikarakara ny hetsika dia handinika ny fandrosoan’ny vondrona sy fanavaozana ny mpikambana ao amin’ny birao nasionaly ary ny fanofanana ireo vehivavy mba ho isan’ny handray anjara mavitrika ka ho kandidà amin’ireo fifidianana hitranga eto amintsika amin’ity taona ity no isan’ny hanamarika ity fivoriana ity.
Raha 600 ny isany mpikambana tao amin’ny VMLF tamin’ny taona 2009 taona izay nijoroany dia efa mahatratra 4.000 izy ireo amin’izao fotoana izao, izany hoe tao anatin’ny efa-taona monja.
Ho an’ny faritra antsinanana manokana dia voafidy ny zoma 29 marsa teo ireo solo-tena 10 hisolo tena azy hiatrika ny fivoriambe nasionaly. Na dia tao anaty disadisa aza no nanaovana izany fifantenana ny solon-tena izany dia fantatra fa manana solon-tena 03 Toamasina I, 02 Brickaville, manana 01 avy Toamasina I – Vatomandry – Mahanoro – Marolambo ary Antanambao Manampontsy.
“Fanomezan-danja ny vehivavy eo amin’ny sehatra fandraisana andraikitra sy amin’ny fanampahan-kevitra ary mba ho isany mpilatsaka ho fidiana, no tanjonay amin’izay fotoana izao. ny tanjona araka ny fifanarahan’ny Sadc mantsy dia ny 50% ny sehatra ara-panjakana fandraisana fanapahana rehetra dia tokony ho tantanan’ny vehivavy avokoa”, izay no nambaran’i Robiarivony Josiane filoha lefitry ny VMLF Malagasy. Nomarihan’dRazanaliva Hortence, mpandrindra ny VMLF Alaotra-Mangoro no sady mpihazom-bolan’ny VMLF nasionaly kosa fa “miara-miasa amina vondrona maro izy ireo, isan’izany ny Firenena mikambana izay nananganany ny tamban-jotra Malagasin’ny fahandriampahalemana, ny maha-mpikamban’ny ‘plate forme de la femme politique de l’ocean indien’, ary ny fiarahanay miasa amin’ny EISA izay manofana ireo vevivavy ho tompon’andraikitra ara-politika…”. Ankoatra izay, dia 74 ny mpikambana voasoratra anarana sy mahaloha ny latsa-kemboka maha-mpikambana azy , ho an’ny VMLF ny faritra atsinanana; ka 38 ho an’i Toamasina I, 08 Toamasina II, 20 Brickaville, 01 Vatomandry sy Marolambo, 03 Mahanoro ary 06 Antanambao Manampontsy