Nosamborin'ny SEG indray ireo Srilankais

04/04/2013

Vao nivoaka ny fonjan’Ambatondrazaka dia nosamborin’ireo zandary tany an-toerana ireo teratany Srilankais miisa 8 voaroiroy noho ny raharaha fitrandrahana tsy ara—dàlana ny safira tany amin’ny kaomina Didy. Araka ny loharanom-baovao dia baiko avy aty Antananarivo no nahatonga izany fisamborana indray ireo Srilankas nafahan’ny fitsarana tany Ambatondrazaka ireo. Ny ministeran’ny Harena ankobon’ny tany no mpitory an’ireto Srilankais ireto. Resy teo anatrehan’ny fitsarana arak’izany ny fanjakana Malagasy tamin’ny alalan’ity ministera ity.

Afaka noho ny fisalasalana izy valo miralahy. Nolavina ny onitra nangatahan’ny fanjakana Malagasy mitentina 100 tapitrisa ariary. Minitra vitsy taorian’ny fitsarana anefa dia tonga ny teny midina avy aty Antananarivo izay nilatsaka tany amin’ireo mpitandro filaminana tany Ambatondrazaka milaza ny tsy maintsy hisamborana indray ireo Srilankey vao nafahan’ny tribonaly ka hoentina aty Antananarivo. Raha vao vita fotsiny ny taratasy samihafa teo anivon’ny fonjan’Ambatondrazaka dia naondrana avy hatrany tao anaty fiara izy ireo tokony tany amin’ny 5 ora sy sasany hariva tany ho any. Niantsona tao amin’ny biraon’ny faritra Alaotra Mangoro aloha ilay fiara nitondra azy ireo mialoha ny nandehanany. Araka ny loharanom-baovao dia resaka solika hampandehanana ny fiara hitondra ireo Srilankey no antony nijanonana tao amin’ny birao ny faritra. Hatramin’ny ora nanoratanay dia mbola mihitsoka tao amin’ny biraon’ny faritra ny fiara mitondra ireo Srilankey sy ny mpitandro ny filaminana. Nisy ihany koa anefa ny loharanom-baovao izay nilaza fa mety ho roahina hiala eto Madagasikara avy hatrany ireto teratany Srilankey ireto.
Lavin’ny zandarimariam-pirenena ny didim-pitsarana?
Iaraha-mahalala fa efa nandrangaranga ny tsy hanaiky ny didim-pitsarana havoakan’ny mpitsara an’ity raharaha ity ny mpitandro filaminana raha toa ka tsy misy ny fanamelohana an’ireto Srilankais ireto. Isan’ny nambaran’ny Sekreteram-panjakana ny amin’ny hampiakarana ny raharaha amin’ny ambaratongam-pitsarana samihafa raha toa ka tsy voaheloka ireo teratany Srilankais ireo izay nambarany fa hitam-poko hitam-pirenena ny asa ratsy nataony. Tsy izany anefa no nitranga satria tsy fampakarana tany amin’ny ambara-tongam-pitsarana ambony no natao fa fisamborana indray. Antony nahatonga ny mpanara-baovao hilaza fa tsy lavin’ny Zandary ny didim-pitsarana.
Marihina fa tomefy olona tanteraka ny fitsarana ambaratonga voalohany tany Ambatondrazaka nandritra ny fitsarana ireo rehetra voarohirohy noho ny resaka safira any Didy. Nanomboka tamin’ny 11 ora atondro ny fitsarana azy 16 mianadahy, 10 vahiny ary malagasy 5 . Tsy nifarana izany raha tsy tany amin’ny 4 ora tolakandro tany ho any. Ny teratany Malagasy no nandraisana didim-pitsarana voalohany. Taorian’ny fihainoana ireo voapanga dia nivoaka ny didy ka mahazo sazy mihantona iray volana izy dimy mianadahy voapanga ho nanakorontana ny filaminam-bahoaka. Rehefa vita ny azy ireo dia niditra nitantana ny fitsarana ny filoha ny fitsarana sy ny tonian’ny fampanoavana. Nohenoina avokoa ireo Srilankey 10 miralahy. Nivoaka ny didy hoan’ireo 6 miralahy voalohany, afaka noho ny fisalasalana izy ireo ary nolavina ny onitra nangatahan’ny fanjakana Malagasy. Niditra indray ny fitsarana Srilakey anankiroa ary dia mbola afaka noho ny fisalasalana izy ireo fa ny Srilankey roa farany izay nosamborina tao amin’ny distrika Moramanga dia mihemotra amin’ny zoma izao ny fitsarana azy ireo. Raha io didy navoakan’ny fitsarana io izany no zohiana dia resy ny fanajakana Malagasy izay marihina fa tsy tonga niatrika ny fitsarana.