Mitaky ny hamerenana ny filohany

04/04/2013

Mampaka-peo amin’izao fotoana izao ireo ampahany maro amin’ireo mpikambana ao amin’ny Vaomieram-pifidianana eny anivon’ny faritra Anôsy na ny CER Anôsy. Tsy ankatoavin’izy ireo ny fanampahan-kevitry ny CENI-T foibe tamin’ny fanesorana tamin’ny toerany ny filohan’izany rafitra mpikarakara ny fifidianana teny anivon’ny faritra Anosy izany, noho izany fanampahan-kevitra izany tsy nialohavana fanadihadiana sy fiaraha-midinika teny ifotony. Mitaky ny fiverenan’ny CENI-T amin’ny fanampahan-keviny arak’izany ireo mpikambana sasantsasany ao amin’ny CER any Anôsy.

Tsy faly tamin’ny fanesorana tamin’ny toerany ny filohan’ny CER any Anôsy ireo mpikabana sasany tao amin’ity rafitra ity. Tsy iza moa ilay filohan’ny CER nesorin’ny CENI-T foibe tamin’ny toerany fa ny Pastora Sinary Origène. Araka ny fanazavan’izy ireo dia isan’ny antony nanesorana an’ity tomponandraikitra ity tamin’ny toerana ny fahafantarana fa manana firehana politika ny tenany. Teo ihany koa ny filazana fa tsy mahavoafehy ny asany ity Pastora ity, ka isan’izany ny tsy fahatongavan’ny tatitra ara-potoana mikasika ny fahavakisan’ny CED Anôsy teny anivon’ny CENI-T. Nisy ihany koa anefa no nilaza fa nanao tsinontsinona ny fahatogavan’ny delegasiona notarihan’ny filohan’ny CENI-T tany an-toerana ny lehilahy.
Tampoka ny fahatongavan’ny filohan’ny CENI-T
Araka ny fantatra dia efa tamin’ny fotoana nandalovan’ny filohan’ny CENI-T tany Tolagnaro no efa nikononkonona ny hanesotra ny filohan’ny CER tamin’ny toerany ireo mpikambana sasantsasany tamin’izany rafitra izany. Saingy tsy tanteraka izany satria maro tamin’ireo mpikambana no nanohitra izany. Teo anatrehan’izany dia voatery naka fanampahan-kevitra ny CENI-T foibe. Fanampahan-kevitra izay tsy nahafaly ny mpikambana maro satria araka ny hevitr’izy ireo dia nisy akory ny fanadihadiana natao mba hahafatarana ny tena marina. Marihina hoy ireo mpikambana ao amin’ny CER Anôsy ireto fa tampoka ny fahatongavan’ny delegasiona notarihan’ny filohan’ny CENI-T avy any Antananarivo. Ilay filohan’ny CER izay nesorina anefa manana ny andraikiny amin’ny maha Pastora azy. Noho izany tsy tao an-toerana ny tenany tamin’io fotoana io.
Eo anatrehan’izany rehetra izany, araka ny loharanom-baovao avy any Tolagnaro dia tsy makasitraka ny fanoloana sy ny fanesorana ny filohany ireo mpikambana avy ao amin’ny CER indrindra ireo avy amin’ireto distrika ireto: Betroka, Amboasary Atsimo ary Faradofay. Amin’izy ireo dia fanaova-tsinotsinona ireo mpikambana izany fihetsiky ny CENI-T izany. Manahy ny mety hisian’ny disadisa eo amin’ny fiaraha-monina sy amin’ny fandaminana ny asa ihany koa izy ireo. Manao antso avo amin’ny filohan’ny CENI-T ary izy ireo mba hiverina amin’ny fanam-pahan-kevitra noraisiny.