Vita ny famindram-pahefana

04/04/2013

Tontosa omaly ny fivoriam-be voalohan’ireo mpikambana vaovao ao amin’ny Birao maharitry ny Antenimieran’ny Varotra sy ny indostria na ny CCI Toamasina. Fantatra ihany koa fa efa nivoaka ny didim-panjakana mitondra ny laharana 29-503 ny 28 marsa 2013 izay navoakan’ny minisiteran’ny Varotra, mametraka araka ny lalàna azy 25 mianadahy voafidy ny 16 marsa teo sy nivoaka ofisialy 21 martsa. Mpikambana miisa 21 tamin’ireo 25 no tonga nanatrika sy nandray anjara tamin’ny fivoriana voalohany omaly. Nandefa taratasy fialan-tsiny kosa ny efatra ambiny. Ny dimy tamin’ireo mpikambana miisa 18 tao amin’ny Comite ad’hoc kosa no tonga nanatrika ny famindram-pahefana. I Botoubebe Rosin avy amin’ny GEL, izay zokiolona tamin’ireo mpikambana no nitarika ny fivoriana izay tsy azon’ny be sy ny maro natrehana.

Toy ny fanao amin’ny fivoriana voalohany toy izao dia ny fandrafetana ny birao maharitry ny CCIT no isan’ny niompanan’ny fivoriana. Toy ny efa nampoizin’ny maro dia lasan’ny vondron’ny mpanondrana lodsia na ny GEL ny toerana maro indrindra tao amin’ny birao maharitra satria toerana miisa 10 no azon’izy ireo.miisa 03 kosa no an’ny ‘prestataire de service’ ary 02 ho an’ny indostria. Marihina fa ny GEL no manana ny toerana 19 amin’ny 25 eo anivon’ny CCI Toamasina. Lasa filohan’ny CCI Toamasina arak’izany i Rafidimanana Narson avy amin’ny GEL, ireo filoha lefitra 03 izay samy vondrona GEL avokoa, avy amin’ny kolejy 03 misy dia Botoubebe Rosin Leon avy amin’ny varotra, Ramaroson David avy amin’ny “prestataire de service” ary Rasata Dominique avy amin’ny indostria.
Ankoatry ny fananganana ny birao maharitry ny CCIT dia isan’ny dingana vita ihany koa ny famindram-pahefana teo amin’ny Comité ad hoc sy ny filoha vaovaon’ny CCIT. Nandritra izany no nanambaran’ny filohan’ny CCIT fa “ny mangaraharaha no laharam-panamehana amin’izy ireo. Tsy maintsy ilaina ny fiaraha-miasa ary tsy azo adino ny mpiasa antoky ny fampihodinana ny CCI Toamasina”.
Fantatra nandritra ity famindram-pahefana ity fa manana vola tsy latsaky ny Ar.800 tapitrisa ny CCI Toamasina raha kitam-bola foana no noraisin’ireo mambra ao amin’ny Comite ad’hoc. Nilaza kosa ireo mpiasa fa ny fijerena ny karaman’izy ireo sy ny tombontsoany ary ny fisotroan-dronony no fitakiana nataon’izy ireo. Marihina fa tonga niatrika ny lanonana koa ireo filoha teo aloha mirahalahy, Randriantsalama Jackie sy Laivao Nitadiavina.