Nangataka tambin-karama

04/04/2013

Nandritra ny fandraisan’ny Lehiben’ny faritra Antsinanana, Alain Mahavimbina azy ireo no nanehoan’ireo mpilalaon’ny U22 avy any amin’izany faritra izany ny fangatahan’izy ireo tambin-karama. Ho setrin’izany dia nilaza ny lehiben’ny faritra fa “azo jerena tsara ny fanampiana ara-bola amin’ny alalan’ny tambin-karaman’ireo ekipa mandrafitra ny solon-tenam-paritra tahaka anareo, saingy ianareo ihany no erany amin’izany fa mpanatanteraka fotsiny izahay avy eo”.

Marihina fa oraisin’ny lehiben’ny Faritra Atsinanana tao amin’ny lapan’ny faritra, ireo mpilalao zazalahy sy zazavavy U22, niatrika ny “challenge 2013” teo amin’ny taranja Basket-Ball. Lasan’ny U22 zazalahy avy any atsinanana ny amboara 2013 raha faharoa hatrany izy ireo tao anatin’ny andiany roa teo aloha. Raraka teo amin’ny ampahefan-dalana kosa ireo U22 zazavavy atsinanana.
“Raha misy ny fiaraha-mientana eo amin’ny mpilalao sy ny mpanazatra ary ny mpanohana rehetra, dia misy hatrany ny vokatra azo toy izao”, hoy i Mahavimbina Alain nandray ireo mpilalao. Nisaoran’ny filohan’ny ligy manokana ny filohan’ny ligy teo alohany sy ny filohan’ny seksiona teo aloha, izay isany mpanampy betsaka ny taranja Basket-ball Atsinanana dia Mbola Rajaonah.
Ekipa roa amin’ny U22 zazalahy sy iray amin’ny zazavavy no tafiditra amin’ny ekipa nasionaly. Azon’ny Lalason U22 avy any Atsinanana ihany koa ny mpilalao mandrika indrindra nandritra ity “challenge 2013”. Ankoatra izay, dia mitohy hatrany ny disadisa eo amin’ny Ascut sy ny filohan’ny ligy vaovao. Efa mandeha indray izao ny hetsika ho fanalana azy sy ny famerenana ny fifidianan’ny mambra ny ligy vaovao. Raha ny angom-baovao ihany koa, noho io olana io indrindra no nahatonga ny kaominin’i Toamasina tsy nanome ny Soavita nanaovan’ireo ekipa Atsinanana U22 ireto ny fanazaran-tena talohan’ny fifaninana nasionaly. Ny ekipan’ny Ascut koa anefa ny 10 amin’ireo mpilalao 12 mandrafitra ny ekipa U22 Atsinanana. Mbola raharaha hafa koa izany ity raharaha Ascut sy ny ligy Basket-ball Atsinanana ity.