Noroahana nody ireo teratany Srilankais

05/04/2013

Efa tafakatra eto Antananarivo ireo Srilankais 8 mirahalahy izay voaroiroy tamin’ny raharaha fitrandrahana tsy ara-dalàna safira tany amin’ny faritra arovana any amin’ny kaomina Didy. Arakan y fanazavana avy amin’ny mpitandro filaminana eto an-toerana dia ho roahina hody any amin’ny tany niaviany ireto mpandraharaha ireto ary efa eo am-pikarakarana izany ny fitondram-panjakana Malagasy amin’izao fotoana izao. Tsara ny manamarika fa fanampahan-kevitra avy amin’ny ministeran’ny Atitany no afahana mandroaka teratany vahiny toy izao rehefa voaporofo fa loza mitatao ho an’ny firenena ny fisian’izy ireo eto amintsika. Mpanatanteraka fotsiny ny fanampahan-kevitry ny ministeran’ny Atitany ny mpitandro filaminana izay mikarakara ny fammpodiana an’ireto Srilankais ireto. Nomarihan’ny mpitandro filaminana anefa fa efa noraisina avokoa ny fepetra rehetra mba tsy hisian’ny fomba mety hampiverina an’ireto mpandraharaha mpividy safira ireto eto Madagasikara intsony.

Tsara ny mampatsiahy fa voasambotra nandritra ny hetsika manokana nataon’ny mpitandro filaminana tany amin’iny distrikan’Ambatondrazaka iny ireto mpividy safira ireto ary naiditra am-ponja vonjimaika tany an-toerana talohan’ny nitsarana azy ireo sy ny namany hafa tao amin’ny fitsarana tany an-toerana ihany. Na dia teo aza ny fampitandremana mafy izay nataon’ny Sekreteram-panjakana miadidy ny Zandarmariam-pirenena, ny Jeneraly Randrianazary, ny amin’ny tokony hampiarana ny sazy famaizana an’ireto teratany Srilankais ireto dia nilaza fa tsy nahita antony tokony hanasaziana azy ireo kosa ny mpitsara tany an-toerana. Vokany : nafahan’ny fitsarana noho ny fisalasalana izy ireo nandritra ny fitsarana natao omaly. Izany hoe, nanaporofo ny fitsarana fa tsy loza mitatao ho an’ny fiaraha-monina velively ireto tera-tany vahiny ireto.
Tetsy an-danin’izany anefa dia tsy nipetra-mora ihany koa ny fitondram-panjakana tamin’ny alalan’ny ministeran’ny Atitany izay nanapa-kevitra fa handroaka an’ireto Srilankais ireto. Fanampahan-kevitra izay mifanandrify tanteraka amin’ny hevitry ny Zandarmariam-pirenena, ka nahatonga ny mpanara-baovao sasantsasany hilaza fa mety ho nisy tsindry avy any amin’ity farany tamin’ny fandraisana izao fanampahan-kevitra izao.