Pasitera Heritiana Any am-ponja

05/04/2013

Naverina eny amin’ny fonjan’Antanimora ny pasitera Heritiana avy ao amin’ny fiangonana Vahao ny Oloko, i Andry Prince de Satan ary ilay naka ny horonantsary mampihoron-koditra taorian’ny fandalovan’izy ireo teo anivon’ny mpitsara mpanao famotorana omaly. Nametraka fitoriana tokoa mantsy i Dama ao amin’ny tarika Mahaleo. Fanalam-baraka ity mpanakanto fanta-daza ity no fiampangana tsy maintsy hanenjehan’ny Fitsarana azy telo mianaka ireto, izany hoe ady heloka tsotra. Etsy an-danin’izany, misy resaka vonoana olona tao anatin’ilay horonantsary, ny gazety La Nation dia efa nilaza fa tokony hanokafana fanadihadiana io fanambarana nataon’i Andry Prince de Satan amin’ny maha heloka be vava azy izay henjehan’ny Fehezan-dalana famaizana eto amin’ny tany sy fanjakana. Ny gazety La Nation rahateo koa no niresaka voalohany azy ity (vakio La Nation tamin’ny 11 febroary 2013). Raha ny tokony ho izy dia manokatra fanadihadiana avy hatrany ny Fampanoavana raha vao misy resaka faty olona na vonoana olona.

Tsy izay anefa ny zava-nitranga ary mampametra-panontaniana hoe: “mbola misy fanjakana ve eto amin’ity Madagasikara ity?”. Nangingiana fotsiny teny ve izany ity raharaha ity raha tsy nitory i Dama avy ao amin’ny tarika Mahaleo? Marihana fa tsy resaka fanalam-baraka ihany izay fahefan’ny Fitsarana ady heloka tsotra no voakasika amin’izao raharaha izao ary tsy resaka ara-panahy fotsiny koa fa ain’olona. Tokony hisaraka mazava tsara araka izany ny andraikitry ny mpitondra fivavahana sy ny mpahay lalàna. Raha misy olona iray ohatra mikônfesy amina mômpera na pasitera fa namono olona, hatraizay ny andraikitr’ireo mpitondra fivavahana ireo? Zon’izy ireo ve ny mitàna izany ho tsiambaratelo? Raha eny, inona eo anatrehan’ny lalàna sy ny Fitsarana izany fanapahan-kevitra izany? Hita koa anefa izao fa Fitsarana tsy afaka handray andraikitra no misy eto amintsika. Tsy tokony niandrasana ny fitoriana napetrak’i Dama velively ny fanokafana fanadihadiana manodidina ity raharaha ity.