Eny an-tsena no misambotra ny zandary

30/10/2012

Na dia tsy isan’ireo distrika nametrahana ireo vondron-kery manokana miady amin’ny asan-dahalo any atsimo aza ny ao amin’ny distrikan’i Sakaraha dia manao hetsika manandrify izany ihany koa ireo mpitandro filaminana any amin’izany faritra izany amin’izao fotoana izao. Mahavelon-taraina ny maro, indrindra ireo ben’ny tanana any amin’ireo kaomina misy tsena any amin’iny distrika iny anefa izao hetsika ataon’ny mpitandro filaminana izao satria miteraka fitongongan’ny tsena ny fisamborana olona eny amin’ireny toerana ireny sy ny fanapoahana basy mandritra izany fotoana

izany.
“Aleo mifanena amin’ny dahalo toy izay mifanena amin’ny zandary”. Io indray amin’izao fotoana izao no fahitan’ny olona any amin’ny distrikan’i Sakaraha ny zava-misy any amin’izy ireo. Mihen-danja ny tsena any amin’ny kaomina maro ao amin’ny distrikan’i Sakaraha. Isan’ny ahitana izany ny any amin’ny Kaomina Miary Taheza sy ny any Beraketa ary ny any Amboronabo izay tsy mamparisika ny olona intsony ny mamonjy tsena amin’izany toerana izany nohon’ny afitsok’ireo zandary izay mampihorohoro ny mpiantsena. Araka ny fitantaran’i Roger, ben’ny tanana ao Amboronabo, distrikan’i Sakaraha dia efa lasa lamaodin’ny zandary any amin’iny faritra iny amin’izao fotoana izao ny misambotra olona mandritra ny fotoanan’ny tsena. Ambaran’ireo mpitandro filaminana ireo, araka ny filazan’ity olom-boafidy ity fa milaza ny efa manana lisitr’ireo olona voatondro fa miray tsikombakomba amin’ny dahalo izy ireo. Ary dia mandritra ny fotoanan’ny tsena no hisamborany azy. Etsy an-danin’izany dia saika isaky ny fotoanan’ny tsena ihany koa no handrenesana poabasy ataon’ny zandary izay mampitahotra ny olona kasain’izy ireo ho samborina. Matetika anefa dia vitan’ny fifampiresahana sy ny fanomezana vola an’ireo zandary ireo ny raharaha dia alefany mandeha tsotra izao ilay olona.
Mampiahiahy ireo ben’ny tanana any amin’ireo kaomina ireo arak’izany ity fomba fiasan’ny mpitandro filaminana ity. Satria sady miteraka fitongonganan’ny fazotoan’ny mpiantsena izany no miteraka fampihorohoroana ho an’ny be sy ny maro ihany koa. Etsy an-danin’izany dia isan’ny mampanahy azy ireo ihany koa ny fisian’ny fanararaotana ataon’ireto mpitandro filaminana ireto manoloana ny fahalemen’ny vahoaka any amin’izany faritra izany. Marihina fa araka ny nambaran’i Roger, ben’ny tanana any Amboronabo dia efa nisy ny fitarainana nataon’izy ireo eny an’ivon’ny distrikan’i Sakaraha manoloana ity toe-draharaha ity. Mbola tsy nisy vokany anefa izany fitoriana izany mandrak’izao.