Nanafika tamin’ny andro atoandro

05/04/2013

Tany antampon-tananan’I Toamasina indray no nitrangan’ity fanafihana mitam-piadiana ity omaly tokony ho tamin’ny iray ora sy sasany atoandro. Jiolahy miisa efatra nitondra PA ary samy tsy misaro-tava no nanafika ny tranom-barotra iray tamin’io fotoana io. Lasan’izy ireo tamin’izany ny vola rehetra izay tombanana ho tsy latsaky ny folo tapitrisa tao anatin’ny fitahirizam-bolan’ilay sinoa tompon’ny tranombarotra. Eo am-pikarohana azy ireo ny mpitandro filaminana hatry ny omaly. Nitrangana fanafihan-jiolahy mirongo basy indray tao Tanambao V, any antampon-tananan’I Toamasina, omaly atoandro tokony ho tamin’ny iray ora sy sasany. Mbola basy PA “22longs rifles” toy izay efa hita tamin’ireo asan-jiolahy efa nitranga tany aloha tao Toamasina hatrany no nampiasain’ireto jiolahy nanafika omaly ireto raha araka ny loharanom-baovao avy any an-toerana.

Ilay magazay fantatra amin’ny anarana hoe “Jieda” izay mivarotra scooter sy kojajokana moto samy hafa no notafihan’ireo jiolahy izay miisa efa-dahy samy tsy nisaro-tava. Marihina fa samy nitondra basy PA avokoa izy ireo. Araka ny loharanom-baovao dia mody nampiresaka ireo mpiasa roalahy izay nanamboatra moto teo ivelan’ilay magazay ny iray tamin’ireo jiolahy. Ny telo kosa niditra ny magazay ka ny iray niambina teo amin’ny varavarana ary ny roa nanery ilay sinoa tompon’ny tranom-barotra hamoha ny “coffre” fitehirizam-bola no sady nanapoaka ny basy teny aminy. Naratra teo amin’ny feny manakaiky ny lohalika havia ilay sinoa, vokatr’izany tifitra izany.

Tsy nazava ny raki-tsary

Tsy fantatra mazava ny vola lasan’ireto jiolahy ireto tamin’izany. Tsy nilaza mazava ny momba an’io rahateo ireo sinoa izay niharan’ity fanafihana ity. Ny tombatombana kosa, miaraka amin’ny hita tamin’ny raki-tsary tao amin’ilay “Camera” fanaraha-maso tao amin’ilay magazay no nafahana naminavina fa mety tsy ho latsaky ny 10 tapitrisa ariary ny fonosana vola lasan’ireto jiolahy. Marihina fa na teo aza ity raki-tsary ity dia tsy nisy nahafantarana an’ilay jiolahy azo sary tamin’izany satria takon’ny satroka nanaovany ny tarehiny. Minitra vitsy monja no nanaovan’ireo jiolahy efatra ireo izany hetsika rehetra izany dia namonjy ny moto scooter 02 efa niandry azy ireo teny ivelany izy ireo ary rifatra nandositra tao An-dalampasika tao andamosin’ilay magazay ary nahazo ny lalam-pasika mivoaka an’i Tanamakoa.
Tamin’ny roa latsaka no tonga ny polisy avy amin’ny kaomisaria Toamasina I, nanaraka azy ihany koa ny FIP ary tonga nifanesy ireo fiarabe roa an’ny Emmo-Securite. Samy nampiasa ny fahaizany teo ireto mpitandro ny filaminana ireto, saingy mbola ankamantatra hatreto ny endrika ireo jiolahy sy ny momba azy ireo. Mbola mitohy hatrany arak’izany ny fanontanian’ny mpanara-baovao maro mikasika ity PA 22 longs Rifles izay fantatra noho izy ity tsy mampijanona vody na bala.