“Tsy misy lalam-panorenana eto”

06/04/2013

Naneho ny heviny manoloana ny raharaham-pirenena amin’izao fotoana izao ny minisitra Tabera Randriamanatsoa, tamin’ny fandalovany tany amin’ny renivohitry ny faritra Antsinanana. Tamin’izany no nilazany fa tsy misy lalam-panorenana eto Madagasikara amin’izao fotoana izao, araka ny ambaran’ny tondrozotra. Nomarihina ihany koa fa ho an’ireo fianankaviambe iraisam-pirenena dia tsy manana lalam-panorenana i Madagasikara amin’izao fotoana izao na dia tsy ambaran’izy ireomivantana aza izany. Porofon’izany ny tsy fankasitrahan’izy ireo ny lalam-panorenana natao amboletra tamin’ny taona 2011 izay nafahan’ny olona nifidy tamin’ny alalan’ny kara-pokontany. Mbola manamafy izay tsy maha ara-dàlana ny lalam-panorenana amin’izao fotoana izao ihany koa, hoy ihany ny minisitra Tabera Randriamanatsoa, minisitry ny asam-panjakana, ny momba ireo mpikamba ao amin’ny fitsarana avo momba ny lalamp-panorenana efa “lany daty” sy “tsy ampy isa” ary “efa tsy izy” intsony namoaka ny maha-ara-dalana azy.

Ireo antony ireo no isan’ny nahatonga ny ankolafy Zafy Albert hilaza fa tokony hasiana fifidianana fitsapan-kevi-bahoaka mialoha ny fifidianana hafa rehetra hatao eto Madagasikara, araka ny fanazavan’ny minisitra Tabera ihany. “Hanomana hetsika goavana manerana ny nosy, sy eto Toamasina ny ankolafy Zafy Albert, entina manazava amin’ny vahoaka ny foto-kevitray mikasika ny hanaovana ny fitsapa-kevi-bahoaka mialohan’ny fifidianana filoham-pirenena ny volana jolay”, hoy ny nambarany. Nomarihany fa “tsy ny fanemorana ny fifidianana ny 24 jolay, na fanakanana ny tsy hanaovana fifidianana izay hany lalan-tokana hivoahana amin’ny krizy, no tanjonay amin’izao hetsika fanentanana hatao izao, fa ny fiarovanay ny maha-Repoblika an’i Madagasikara sy tsy fisian’ny lalàna entina mandrindra ny fifidianana ary hitondràna ny firenena aorian’ny hahazoantsika filoham-pirenena vaovao atsy ho atsy”.
Tsy voafaritra mazava anefa ny fotoana hanaovan’izy ireo ny hetsika, fa ny hany hita fotsiny izao ao Toamasina dia ny fihetsiketsehan’ireo mpiara-dia amin’ny ankolafy Zafy Albert sy ireo mpandala ny fanjakana federaly manomana izany, izay tokony atao alohan’ny 09 aprily izao, izay fotoana hisian’ny fihaonana eo amin’ireo mambra ny governemanta handinika ny tolo-kevitry ny ankolafy Zafy Albert mikasika ny fanaovana ity fitsapan-kevi-bahoaka sy hanolorana lalam-panorenana roa hahafahan’ny Malagasy misafidy ny rafitra tena hitany fa hahafahana manalana ny olana sy ny krizy ary hanatsarana ny firaisam-pirenena marina. Ankoatra izany, ho an’ny ankolafy zafy Albert, dia tokony atao ny 08 may izao ity fitsapa-kevi-bahoaka ity.