Nisy saika hanondrana

08/04/2013

Nahitana marika izay midika fa efa viaisa ary efa nogiazan’ny ministeran’ny Tontolo iainana ireo andramena tratran’ny ladoany tany Toamasina ny zoma alina teo. Mametram-panontaniana ny amin’ny mety ho fisian’ny tsikombakomba hanondranana antsokosoko ireo andramena nogiazan’ny minister any mpanara-baovao manoloana ity raharaha ity. Ankoatry ny hosoka teo amin’ny filazana ny entana tao anatin’ireo kaontenera roa sarona ireo dia tondroina ho isan’ny fanondranana an-tsokosoko ny harem-pirenena ihany koa ity zava-nitranga tany amin’ny ladoany tany Toamasina ity. Araka ny loharanom-baovao avy any an-toerana dia kaontenera roa feno andramena indray no saron’ny mpiasan’ny ladoany tany an-toerana ny alin’ny zoma lasa teo. Tahaka ny nitranga tamin’ny fahatratrarana ireo kaontenera nisy andramena tany Taolagnaro dia nolazaina fa vatosoa ihany koa ireto tratra tao Toamasina ireto. Izany hoe nolazaina ho vatosoa « quartz » ity saika hahondrana ity raha nanao ny filazana teo anivon’ny fadintseranana tao Antanimena ny tompony. Voalaza fa mpandraharaha monina ao Anjohy Antananarivo ity nikasa hanondrana andramena ity.

Raha ny fanazavan’i Ramilimanana Haja, « receveur » n’ny ladoany ao Toamasina, dia nampiasa kaontenera roa mitovy ity mpanao trafikana andramena ity, satria mitondra ny laharana ECMU 144 136/9 sy GMAU 024 234/9 ireo saika hanondranana « quartz », dia izay ihany koa no laharana nanaovany ny kaontenera saika hanondranana ireo « bois de rose ». Ny angom-baovao teo anivon’ny fadintseranana Toamasina no nahalalana fa ireo mpiasan’ny SPAT manao ny fanaraha-maso ireo kamiao miditra sy mivoaka ny vavahady, « porte 5 » no nahatsikarika ny raharaha, satria ny maraina ny zoma dia efa hitan’ireo mpiasa niditra ny seranan-tsambo ireto kaontenera 02 ireto, saingy mbola niandry tao anatin’ny seranana fotsiny aloha aloan’ny hahatongavan’ilay kaontenera misy ny « quartz » entina hanariana dia ireo mpiasa mpanao fitiliana amin’ny « scanner », satria ireto kaontenera roa misy ny vatosoa ireto ihany no saika hampandalovina amin’ilay « scanner » ary eo am-pidirana ny TAC misy ny MICTSL vao hafamadika ireto kaontenera mitovy laharana.

Saika natakalo

Saingy mailo hatrany ny teo anivon’ny fadintseranana sy ny mpiasan’ny Spat, ka nanara-maso hatrany ireto kamiao sy ireo kaontenera hafahafa ireto. Ny zoma tamin’ny 09 ora alina raha hita ny fandikan-dalana tamin’ny fampiasana kaontenera roa mitovy laharana ity, dia nisy aloha ny fanagejana natao izany ary ny sabotsy maraina teo no nanomboka ny fisavana ary teo nahatrarana ireto andramena feno kaontenera tao an-tokontan’ny MICTSL saika hahondrana amin’ny sambon’ny CMA-CGM Delmas efa niantsona teo amin’ny « môle C3 » hiainga ny anio alatsinainy.
« Tsy kely lalana ny mpanao ity trafika na andramena ity, nefa raha mahazo vaovao ihany koa izahay fadintseranana dia tsy maintsy misambotra sy manageja izany, mba tsy ho lasa gaboraraka ny harem-pirenena ». Izay no nambaran-dRamilimanana Haja. Ny angom-baovao hatrany no nahalalana fa efa misy fitomboka « OF » ireto andramena tratra ireto, midika izany fa ireo andramena efa nogiazan’ny minisiteran’ny ala sy ny tontolo iainana izy ireo. Fantatra ihany koa fa saika any Malaisie no hanondranana azy ireto araka ny taratasy. Hatramin’ny sabotsy teo dia nogiazana eo anivon’ny MICTSL ireo kaontenera 02 misy andramena, toraka izany koa ireo kaontenera roa mitovy laharana aminy misy ireo « quartz » ; anio kosa no atao ny fanisana azy ireo.