Namory vahoaka tany Ambatondrazaka

08/04/2013

Fanakianana ny fitondram-panjakana tetezamita no nisongadina nandritra ny fihaonan’ny delegasion’ny ankolafy Ravalomanana notarihan’I Rakotoarivelo Mamy sy Botozaza pierrot ary Razafimanantsoa Hanitra, tamin’ny vahoakan’Ambatondrazaka tamin’ny faran’ny herinandro teo. Nanolotra fanomezana maro tany an-toerana ihany koa izy ireo.

Niditra mivantana tamin’ny antso an-tariby nandritra ny fihaonan’ny delegasion’ny ankolafy Ravalomanana tamin’ny vahoakan’Ambatondrazaka ny filoha teo aloha, Ravalomanana Marc. Nanome toromarika ny mpomba azy tany an-toerana ny tenany nandritra izany fidirana mivantana izany. Ankoatr’izay dia isan’ny nanamarika ity dian’ny ankolafy Ravalomanana tany Ambatondrazaka ity ihany koa ny lahatenin’ireo izay nandray fitenenana tamin’izany.
Isan’izany ny Filoha lefitry ny CST Hanitra Razafimanantsoa izay nanakiana mafy ny tsy fisian’ny firaisan-kina eo amin’ny mpitondra ny tetezamita amin’izao fotoana izao sy ny fisian’ny fanakanana ny akolafy Ravalomanana tsy hahazo miteny amin’ny TVM sy RNM. “tsy mahazo misehatra ao amin’ny TVM sy RNM ny Ankolafy Ravalomanana ka izay no antony mahatonga anay mitety faritra toy izao”, hoy hatrany ity olom-boatendry ity.Tsotra ny angatahan’ny Ankolafy Ravalomanana hoy hatrany i Hanitra Razafimanantsoa, dia ny fampiharana ny tondrozotra amin’ny antsipiriany. “Avoahay daholo ny gadra politika, tanteraho ny amnistia, avelao hiasa malalaka ny orinasa Tiko isan’izany ny eto amin’ny Fanampy Vohidiala eto aminareo, ary indrindra ny andininy faha-20 ny fampodiana ny filoha Ravalomanana”. Izany no isan’ny fanambaran’ity tompon’andraikitra ity.
Ny Praiministra Lefitra Pierrot Botozaza kosa dia nanakiana mafy ny mpitondra Fat. Nosimbaina ny firenena hoy izy, “Nanomboka tamin’ny 2009 dia simba ny ho avin’ny taranaka Malagasy, anjaran’ny fitondrana ny mampianatra ny zaza Malagasy ary tsy ekena ny fanapotehina toy izao” hoy hatrany ny Praiminisitra lefitra. “Potika ny firenena, manjaka ny dahalo, ny dahalo ambony latabatra. Misy maka ankeriny ny harem-pirenena toy ny andramena sy ny volamena, fasimainty, sns…Atambaro ny hery ary aza matahotra.Fanjakana tsy ara-dalàna no misy eto”, araka ny nambaran’i Botozaza Pierrot.
Raha nandray fitenenana kosa ny filohan’ny Kongresin’ny tetezamita dia nanamafy fa :”fanjakana tsy mahefa no misy eto, fanjakana tsy nandalo fifidianam-bahoaka”. “Ny fahorian’ny vahoaka no manaram-penitra eto Madagasikara”, hoy Mamy Rakotoarivelo. Niantso ny vahoaka tsy ho voafitaka ihany koa ny tenany. “Jereo ny làlana mankaty Ambatondrazaka fa ratsy dia ratsy, raha teo i Dada dia efa vita ela ny làlana aty aminareo.Tsy misy intsony ny famatsiana fitaovana ny mpianatra “kit scolaire” tamin’ny andron’I Dada noho ny tsy fahaiza-mitantana” hoy hatrany ny lehiben’ny delegasion’ny ankolafy Ravalomanana. Mbola nohamafisin’ny filohan’ny CT teto fa matoa nosoniavina ny tondrozotra dia tokony hampiharina amin’ny antsipiriany. “Matahotra ny masony kanefa mifidy ny lohany” ny sasany hoy izy. Ny fikatsahana ny fitoniana no tena zavadehibe amin’io tondrozotra io, koa noho izany dia ampiharo ny andininy faha 16, 17, 18, 19, 20. Mbola nohamafisiny teto ihany koa fa na izy lehiben’ny andrim-panjakana aza tsy mahazo miteny sy miresaka amin’ny haino amanjerim-panjakana.Marihina fa nanome 4 tapitsisa ariary ho an’ny zanak’Alaotra ny filohan’ny CT. Nanome omby dimy, bodofotsy hoan’ireo be antitra miisa 200, mailot 9, finday 9, 5 hetsy ariary hoan’ny Zami, 3 hetsy ariary hoan’ny mpilalao rugby, koveta 200 hoan’ireo mpivaro-trondro, vary iray taonina ny Praiminisitra lefitra Botozaza.