Hamita-bahoaka indray ve ?

09/04/2013

Nivoaka tamin’ny torimasony indray ry zareo tompon’andraikitra misahana ireo sampan-draharaham-panjakana natao hanara-maso ny raharaham-bola eto Madagasikara, indrindra taorian’ny fahitana ny fahavononan’ireo kandidà samihafa amin’ny fifidianana filoham-pirenena. Isan’ireny ny Samifin sy ny Bianco izay efa nandrangaranga fa hanara-maso akaiky ny fampiasam-bolan’ireo kandidà mandritra ity fifidianana ity.

Hatreto dia vitsy no resy lahatra manoloana an’ity filazan’ireto mpanara-maso ny fandikan-dàlana amin’ny fampiasam-bola eto amintsika ireto. Antony maro no ilazana izany, ka isan’ny lehibe indrindra amin’izany ny fahitana ny zava-bitan’izy ireo manoloana ny tranga maro dia maro niseho tao anatin’izao tetezamita izao izay toa nahitana fa ninia nikimpy fotsiny ihany izy ireo. Ohatra amin’ireny ny raharaha bois de rose, ny raharaha fitrandrahana sy fanondranana tsy ara-dàlana ireo harena ankibon’ny tany eto amintsika, ny raharaha fitantanam-bolam-panjakana, ny raharaha orin’asa vaventy sasantsasany eto Madagasikara izay samy tsy ahitana na dia fanadihadiana kely aza hatramin’izao avy amin’ireo voalaza fa sampan’asa miady amin’ny famotsiam-bola na miady amin ‘ny kolikoly ireo. Tsy vitsy arak’izany ny milaza fa ramatahora fotsiny ary fanjambana ny mason’ny mpijery ny hetsk’izy ireo, raha hisy izany.
Isan’ny nambaran’ny tale jeneralin’ny Samifin tamin’ny fanambarana an-gazety nataony omaly ny amin’ny tsy fisian’ny làlana mametra ny habetsahan’ny vola hampiasain’ny kandidà amin’ireo fifidianana hatao eto Madagasikara. Nambarany ihany koa fa misy fepetra ny famaritana ny loharanom-bola hampiasain’ny antoko. Fepetra izay milaza fa ny latsakemboka ny fanomezana ny tolotra, ny vokatra azo avy amin’ny fihetsiketsehana : ireo no loharanom-bola eken’ny làlana ho an’ny antoko politika. Voararan’ny làlana kosa ny vola azo avy amin’ny fanjakana avy any ivelany na ny vola azo avy amin’ny orinasam-panjakana avy eto an-toerana.
Ankoatra ny Samifin dia efa nandrangaranga ny hanara-maso akaiky ny fampiasam-bola mandritra ny raharaham-pifidianana ihany koa ny Bianco (Birao mahaleotena miady amin’ny kolikoly). Nambaran’ny talen’ity sampan’asa ity fa vanim-potoana mety hampirongatra ny fandikan-dàlana sy ny kolikoly ny vanim-potoanan’ny fifidianana.
Tsara ny mampahafantatra fa efa natsangana vovonana ahitana ireo sampan’asa samihafa toy ny « Médiature de la République », ny Chaine pénale anti-corruption, ny CSI (Comité pour la sauvegarde de l’intégrité), ny Bianco ary ny Samifin izay hifanome tanana amin’ny fanaraha-maso mandritra ity fididianana ity.