Kandidà telo no efa nametraka ny atontan-taratasiny

09/04/2013

Nisokatra omaly ny vanim-potoana ahafahan’ireo kandidà amin’ny fifidianana filoham-pirenena mametraka ny atontan-taratasy filatsahan-ko fidiny teny anivon’ny Fitsarana manokana momba ny fifidianana. Kandidà telo sahady no efa nametraka ny filatsahn-ko fidiny tamin’io omaly io. Tsy niandry ela fa tamin’ny andro voalohany tafiditra amin’ireo vanim-potoana azoana mametraka ny taratasy filatsahan-ko fidina filoham-pirenena, dia efa telo sahady ireo kandidà izay nametraka izany teny anivon’ny CES (Cour électorale special) teny Ambohidahy, omaly. Tsy iza ireo fa i Lahiniriko Jean sy Hajo Andrianainarivelo ary Roland Ratsiraka. Raha tsiahivina dia nisokatra omaly 8 avrily ny fe-potoana azoana mametraka ny atontan-taratasy filatsahan-ko fidina ho an’ireo kandidà hilatsaka ho filoham-pirenena. Tsy hifarana izany fe-potoana izany raha tsy amin’ny andron’ny faha 27 avrily.

Samy nanana ny nambarany ireo mpilatsaka ho fidina ireo tamin’ny fahatongavany teny amin’ny CES, omaly. Ho an’ny kandida Lahiniriko Jean dia nasongadiny fa tsy kandidàn’ny UDRC ny tenany fa kandidan’ny vondrona vaovao fantatra amin’ny hoe KML (Komity mpanohana an’i Lahiniriko Jean). Ankoatr’izay dia nitaky ny amin’ny hisian’ny ezaka manokana avy amin’ny CENI-T mba hampahafantarana ny be sy ny maro ny fampiasana ny vato tokana n any bulletin unique ny kandidà Lahiniriko Jean. Ho an’ny kandidà Hajo Andrianainarivelo kosa, nambarany fa tsy tokony hisy sakatsakana intsony ny fanatanterahana ny fifidianana satria efa miandry izany ny vahoaka Malagasy amin’izao fotoana izao. Nanana ny nambarany ihany koa ny kandidan’ny MTS, Ratsiraka Roland. Ho an’ity farany dia tokony hisy ny fampihaonana ireo kandidà tsy an-kanavaka amin’ity fifidianana filoham-pirenena ity mba ahafahana mamaritra dina iombonana ho fampizorana an-tsakany sy an-davany ny fifidianana.
Ny mpiraki-draharaha eo an’ivon’ny fitsarana manokana momba ny fifidianana n any CES no nandray ny atontan-taratasy filatsahan-ko fidin’ireo kandida ireo teny Ambohidahy. Atontan-taratasy izay ahitana ihany koa ny vola mitentina 50 tapitrisa ariary izay takiana amin’ny filatsahan-kofidiana filoham-pirenena. Araka ny efa nambara tery aloha dia manana hatramin’ny 27 avrily ireo izay te-hilatsaka ho fidina ahafahany mametraka ny atontan-taratasiny eny amin’ity rafitra manokana ity. Hanomboka amin’ny 28 avrily kosa ny fandinihin’ireo mpitsara manokana an’izany izay haharitra dimy andro. Aorian’izay no hivoaka ny lisitr’ireo kandidà mahafeno ny fepetra ka hifaninana amin’ny fifidianana filoham-pirenena. Marihina fa mbola azo fenoina hatrany ny atontan-taratasin’ireo izay efa nandrotsaka ny azy raha tsy ampy izany mandrotra io fepotoana hatramin’ny 27 avrily io.