Nandresy Ramino Paul

10/04/2013

Ny Jeneraly Rabotoarison Charles Sylvain no voafidy ho filohan’ny Filankevitra fampihavanana Malagasy nandritra ny fifidianana izay natao omaly tao amin’ny foiben’ity rafitra ity etsy amin’ny 67 ha. Araka ny fantatra dia kandidà natolotry ny Ray aman-dreny mijoro ity lasa filohan’ny FFM ity. Amin’ny alakamisy izao no hanao fianihanana ny filoha vaovaon’ny FFM. Vato miisa 24 no azon’ny kandidà, ny Jeneraly Rabotoarison Charles Sylvain tamin’ny fifidianana fihodinana voalohany raha 11 no azon’i Mara Edouard Ramanevy izay mpifanandrina voalohany taminy. Nitombo iray, izany hoe lasa 25 kosa ny isan’ny vato azon-dRabotoarisonCharles Sylvain tamin’ny fihodinana faharoa raha lasa 18 no azon’i Mara Edouard Remanevy. Ity farany izay tsy iza fa iray amin’ireo mpikambana tao amin’ny FFM ihany.

Mazava loatra fa samy nanana ny fahitany ity fifidianana ity ny rehetra indrindra tamin’ny fahitana ny fivoaran’ny isam-bato azon’ny filoha voafidy. Ho an’ny mpanara-baovao maro dia toy ny efa nifamatotra tamin’ny filohan’ny FFM ireo mpifidy miisa 24 izay nifidy azy tamin’ny fihodinana voalohany ary noezahina nampiana vato iray fotsiny izany tamin’ny alalan’ny fandresena lahatra ny mpikambana iray hafa tamin’ny fihodinana faharoa.
Efa nanana andraikitra maro
Na izany na tsy izany dia ny kandidà Rabotoarison Charles Sylvain izany no lasa filohan’ny FFM. Araka ny loharanom-baovao avy ao amin’ity rafitra ity dia ny Ray aman-dreny mijoro tarihan-dRamino Paul no isan’ny tena nanohana mafy an’ity kandidà ity tamin’izany fifidianana izany. Tsar any mampatsiahy fa tsy isan’ny mpikambana ao amin’ny FFM ny jeneraly Rabotoarison. Efa maro ny sehatra nahafantarana azy teo amin’ny firenena, raha tsy hilaza afa-tsy ny naha komandin’ny zandarmariam-pirenena ny tenany. Efa minisitry ny atitany ihany koa izy tamin’ny fitondran’ny Profesora Zafy Albert ary efa minisitry ny Rano sy ny Ala tamin’ny fitondran-dRavalomanana Marc. Taorian’ny naha minisitra azy dia efa notendrena ho mpikambana tao amin’ny Antenimieran-doholona ihany koa izy, mbola nandritra ny fitondrana Ravalomanana ihany. Ary taorian’ny fifanaovan-tsonia ny fifanarahana ka nananganana ny governemantan’ny firaisam-pirenena dia isan’ireo kandidà tamin’ny toeran’ny Praiminisitra ny tenany.
Araka ny fantatra dia rahampitso alakamisy no hanao ny fianihanany ny filoha vaovaon’ny Filankevitra fampihavanana Malagasy. Eny amin’ny fitsarana Tampony eny Anosy no hanatanterahana ny lanonana handraisana ny fihanihanany. Ankoatry ny fifidianana ny filohany dia mbola hiroso amin’ny fifidianana ny filoha lefitra miisa enina ao amin’ny ihany koa ny FFM. Eo ihany koa ny fanendrena ny mpampaka-teny roa.