Ahiana hisy hetsika goavana

10/04/2013

Mbola tantara tsy voavaha hatramin’izao ny raharaha Hetsika Fagnomba sy QMM ary ny Faritra Anôsy. Efa ho roa volana izao no nitazonana an-tranomaizina ireo mpikambana ao amin’ny hetsika fagnomba. Antony roa lehibe no itazonana azy ireo. Ny iray dia hono ny sakan-dalana teny amin’ny 4 chemins Bezavona-Mandena, ka nitondran’ny QMM ny raharaha teny anivon’ny fitsarana.

Efa indroa ity raharaha ity no niakatra fitsarana saingy tsy tanteraka fa nahemotra amin’ny faha 30 avrily indray. Intelo nangataka fahafahana vonjimaika ho an’ireo mpitarika ny Fagnomba ny mpisolovava azy ireo saingy nolavin’ny fitsarana hatrany. Ny faharoa dia ny fahavakisan’ny tranon’ny CENI-T-CED.. Amindry zareo Fagnomba dia tetika efa tsara omana nataon’ny Faritra sy ny CENI-T hahafahana mampiditra azy ireo any am-ponja ity raharaha ity. Natao izao fanasoketana izao hoy ireo mpikambana ao amin’ny hetsika Fagnomba mba hamonoana ny tolona sy ahafahana mitsikera ny zava-doza ataon’ireo solontenan’ny FAT.
Ny lehiben’ny faritra no tondroina amin’izany ary mbola takian’izy ireo hatrany ny fanesorana azy tamin’ny toerany. Tsy mifanalavitra amin’izany ihany koa ny fanoloana ny lehiben’ny zandary any an-toerana izay nambaran’ny Fagnomba fa nampamono ireo mpanao fihetsiketsehana.
Maro amin’ireo fikambanana misy ao Tolagnaro no mifamorivory etsy sy eroa amin’izao fotoana izao ary mikonikonina ny hanao hetsika hanehoana ny tsy hafaliany manoloana ity raharaha ity. Ny mpikambana Fagnomba sisa tsy voasambotra ihany koa dia manohy ny fikarohana paik’ady vaovao hanohizan’izy ireo ny tolona. Izany indrindra no niompanan’ny fivoriandry zareo ny fiandohan’ity herinandro ity tao amin’ny trano fonenan’ny filoha lefitra Sedera Joel ao Amboanato. Feno hipoka ny toerana. Mbola teo koa ny fivorian’ireo fikamban’ny foko na fikambanana ara-drazana avy amin’ny faritany enina, tao amin’ny tranoben’ny varotra C.C.I ny alatsinainy teo. Tanjona amin’ity fivoriana tampoka ity ny hampihenana ny hafanana misy eo amin’ny mponina manoloana ny raha tsy manjary ao an-drenivohitra. Fivoriana zay mbola hitohy ny alarobia.