Nangataka 7,6 miliara ariary ny Emmo-nat

11/04/2013

Nitombo isa hatrany ireo izay mametraka fepetra amin’ny fandraisany anjara amin’ny fanatontosana araka ny tokony ho izy ny raharaham-pifidianana. Ankoatry ny ankolafy Ravalomanana izay nilaza fa tsy handray anjara raha tsy tonga eto ny filoha teo aloha, dia nitaky volabe hahafahany manatanteraka ny asa fitandroana ny filaminana mandritra ny fifidianana ihany koa ny mpitandro filaminana avy ao amin’ny Emmo-nat.

Vola mitentina 7 600 000 000 ariary no nambaran’ny Emmo-nat fa ilain’izy ireo mba ahafahany miantsoroka ny asa fitandroana ny filaminana mandritra ny raharaham-pifidianana hatao eto Madagasikara. Izay no nisongadina nandritra ny valandresaka ho an’ny mpanao gazety izay nataon’ny mpitandro filaminana, nahitana ny fandraisan’anjaran’ny komandin’ny zandarmariam-pirenena Ravalomanana Richard omaly. Nambaran’izy ireo fa vanim-potoana manokana eto amin’ny firenena ny fiatrehana ny fifidianana. Noho izany dia ilàna hetsika manokana ihany koa ny fitandroana ny filaminana mandritra izany. Isan’ny antony nahatonga azy ireo hilaza izany, araka ny fanazavan’ny Jeneraly Ravalomanana Richard dia ny amin’ny mety hisian’ny fihetsiketsehana izay mety hataon’izay te-hanakorontana ny fizotran’ny fifidianana.
Tsiahivina fa tsy sambany akory ny nangataka teti-bola manokana hiatrehana ny fandriam-pahalemana mandritra ny fifidianana ny mpitandro filaminana amin’izao fotoana izao. Vao tsy ela akory izay dia efa namely ny fangatahan’izy ireo ny filohan’ny CENI-T sy ny solontenan’ny Fianankaviambe iraisam-pirenena izay nilaza fa tsy tafiditra amin’ny fikarakarana ara-teknika ny fifidianana akory izay resaka fitandroana ny filaminana izay.
Rahaaraham-panjakana
Ny mahagaga amin’ity fihetsiky ny mpitandro filaminana ity dia ny fisisihan’izy ireo hitovy lanta amin’ny mpanao politika. Iaraha-mahalala ny fandrahonana ataon’ny ankolafy Ravalomanana ny amin’ny tsy handraisany anjara amin’ny fifidianana raha toa ka tsy avela ho tonga eto Madagasikara mialoha ny datim-pifidianana ny filoha teo aloha. Dia torak’izany ihany koa izao fihetsika asehon’ny mpitandro filaminana izao izay tsy isalasalana ny milaza fa manamafy ny filazana fa mety tsy ho tanteraka araka ny tokony ho izy ihany ity fifidianana ity. Ankoatr’izay dia mampametram-panontaniana ihany koa ny amin’ny tsy maintsy hanaovana tsindry amin’ny alalan’ny fanambarana an-gazety mikasika izany fangatahana izany. Moa ve tsy raharaham-panjakana ny asan’ny mpitandro filaminana? Izany hoe, na misy na tsy isy izany fangatahana izany dia tokony handeha ho azy ny fanomezana ny ho enti-manana amin’ny fiatrehana izany. Efa misy rahateo ny teti-bolam-panjakana amin’ny fiatrehana ny fifidianana. Koa mahagaga raha tsy maintsy hanaovana famoriana mpanao gazety indray ny fitakiana ny vola ilaina amin’izay fitandroana ny filaminana mandritra ny fifidianana izay.
Betsaka arak’izany ny fanontaniana mipetraka manoloana iny fitakiana nataon’ny Emmo-nat iny izay manamafy ny ahiahin’ny maro ny amin’ny mety tsy hahatomombana araka ny tokony ho izy ity fifidianana ity na dia ho tanteraka amin’ny daty efa namaritana izany.