Nifandona ny mpianatra sy ny Emmo-reg

31/10/2012

Tsy vitan’ny nifampiantsy intsony ny mpianatra sy ny mpitandro filaminana, omaly teny Ankatso, fa tonga hatramin’ny fifandonana ny raharaha. Torabato no nentin’ireo mpianatra namely ny fandefasana baomba mandatsa-dranomaso nataon’ny mpitandro filaminana. Nisy ihany koa ny fifanenjehana hatrany amin’ny faritry ny anjerimanontolo. Vokany: mpianatra miisa 11 no voasambotry ny mpitandro filaminana. Miisa roa kosa ny naratra tamin’ireo mpitandro filaminana. Niatomboka tamin’ny fihetsikesehan’ny mpianatra izay nirotsaka teny amin’ny fiantsonan’ny taxibe teny Ankatso izany

rehetra izany. Hatsika izay fitakiana ny fandoavana ny vatsim-pianaran’ny mpianatra sy ny fampitaovana azy ireo avy amin’ny fitondram-panjakana.Niafara tamin’ny fifandonana teo amin’ny mpianatra sy ny mpitandro filaminana ny fihetsiketsehana nataon’ny mpianatra avy eny Ankatso, omaly. Nivoaka ny faritry ny oniversité ireo mpianatra izay nanao fihetsiketsehana naneho ny fitakian’izy ireo ny vatsim-pianarany. Teny amin’ny faritra fiantsonan’ny Taxi be eny an-toerana no nanaovan’ireto mpianatra ireto ny hetsik’izy ireo. Tonga teny an-toerana ihany koa anefa ny mpitandro filaminana avy amin’ny Emmo-rég izay nandrava izany hetsika izany tamin’ny alalan’ny fandefasana baomba mandatsa-dranomaso. Nisy arak’izany ny fanoherana nataon’ny mpianatra. Fanoherana tamin’ny alalan’ny tora-bato izay voalaza fa nandratrana mpitandro filaminana miisa roa. Raikitra avy eon y fifanenjehana izay nahatafiditra ireo mpitandro filaminana hatrany amin’ny faritry ny oniversité, nisambotra ireo mpianatra izay nambaran’izy ireo fa nitarika izany fifampitorahana izany. Mpianatra miisa 11 no voasambotr’ireo mpitandro filaminana nandritra izany fidirana hatrany amin’ny faritry ny oniversité izany. Ankoatry ny fisamborana ireo mpianatra dia tsy vitsy ihany koa ireo fiara nandalo teny amin’izany faritra izany nandritra ny fifandonana no voatoraka ka nisy ny vaky fitaratra. Nihitsoka nandritra ny fotoana maromaro ihany koa ny fifamoivoizana teny an-toerana nandritra ireo fotoana ireo.
Marihina fa nahabe resaka nandritra ity raharaha ity izay fidiran’ny mpitandro filaminana tany amin’ny faritry ny oniversité izay. Nambaran’ny avy ao amin’ny fiadidiana ny anjerimanontolo fa tsy ara-dàlana izao fihetsiky ny mpitandro filaminana izao satria tsy misy afaka manala ny fahafaha-manao fihetsiketsehana an-kalalahana eny amin’ny faritry ny oniversité raha tsy ny filohan’ity toeram-pampianarana ity ihany. Tsy nanao izany anefa ity farany nandritra ity hetsika omaly ity. Tetsy an-danin’izany dian nilaza ny mpitarika ireo mpitandro filaminana fa andraikitr’izy ireo ny misambotra ny olon-dratsy, ary foana avy hatrany izany tsy fahafahana miditra any amin’ny faritry ny oniversité izany raha fanatra fa mihafina ao amin’io faritra io ilay olona tadiavina. Nomarihan’izy ireo fa fantany ary efa narahiny maso ireo mpianatra izay nitora-bato ny mpitandro filaminana ka izay no antony nidiran’izy ireo tany amin’ny faritry ny oniversité.
Tsara ny mampatsiahy fa ny fitakiana ny vatsim-pianarana sy ny fampitaovana no anton’ity hetsika nataon’ny mpianatra teny Ankatso ity. Araka ny nambaran’izy ireo dia tsy mbola nahazo vatsim-pianarana izy ireo hatramin’ny nanombohan’ny taom-pianarana. Nilaza ihany koa izy ireo fa hitohy ity fitakiana ity mandram-pazoana izany vatsim-pianarana izany. Marihina fa efa nisy ny hetsika fanairana izay nataon’ny mpianatra tamin’ny herinandro lasa teo. Hetsika izay nataon’izy ireo teo amin’io toerana io ihany ary noravan’ny mpitandro filaminana.