Any Toamasina ny “OCHA/UNEP”

11/04/2013

« Tsy tahaka ny loza-voajanahary efa mahazatra antsika ny loza ateraky ny orinasa goavana sy ara-tsimika raha sanatria ka mitranga izany. Ny fahatarana na iray minitra monja dia mety hahatonga fahafatesan’olona an-jatony na haretimandringana tsy hay tohaina ». Izay no nambaran’i Randriamanantsoa Edmond tompon’andraikitra ny fanaraha-maso sy tomban’ezaky ny BNGRC izay miara-dàlana amin’ireo manampahaizana iraisam-pirenana avy amin’ny “OCHA/UNEP” any Genève izay mandalo any Toamasina amin’izao fotoana izao. Nanao fitsidihana ara-pomba fanajana ny lehiben’ny faritra Antsinanana, Mahavimbina Alain, ireto iraka manokan’ny firenena mikambana ireto omaly. Nambaran’izy ireo fa « tonga eto izahay hijery ny fomba hifanohanana amin’ireo komity efa mijoro mikasika ny olana indostrialy sy simika ; hanao tombana ny fomba hisian’ny fanofanana sy fampianarana ary fenentanana ny vahoaka, izay isan’ny vahaolana tsara amin’ny fotoana hitrangan’ny loza, ary hijery koa ny traikefan’ireo toeram-pitsaboana sy ireo orinasa efa manana drafitra manokana mikasika izany ».

Orinasa maromaro no hanaovan’ny OCHA/UNEP sy ny BNGRC fitsidihana amin’izao diany any Toamasina izao. Isan’izany ny orinasa Ambatovy, ny Galana, ny Spat, ny Madarail ary ny Zeren izay mbola misy ambin’ireo vokatra simika tsy nampiasaina akory tamin’ny fotoana nanorenana azy tamin’ny taona 80. Nefa ireo sinibe fitoerany efa simba sy lo avokoa ankehitriny. Ankilan’izay dia isany voaresaky ny lehiben’ny faritra nandritra ny fihaonana ny mahakasika ireo entona votsotra efa indroa tao anatin’ny roa taona tao anivon’ny orinasa Ambatovy, izay niteraka aretina ho an’ny mponina manodidina sy nanimba ny zava-boary ary nisy fiantraikany tamin’ny fiharian’ny mponina manodidina ny orinasa. Nanamarika anefa ny BNGRC sy ny OCHA/UNEP fa « tsy mpanao ‘audit’ izy ireo fa natao kosa hanatsarana ny fomba fiasa hialàna amin’ny fiatraikan’ny loza amin’ny mponina raha sanatria ka mitranga izany ». Ankoatra ireto avy amin’ny BNGRC sy ny OCHA/UNEP avy any Genève ireto, dia fantatra ihany koa efa efa nisy tera-tany Norveziana tonga koa tao Toamasina nanao fanadiadiana mikasika ny loza indostrialy sy simika ity, saingy niompana fotsiny tamin’Ambatovy ny asany.