Miahiahy ireo lehiben’ny Faritra

11/04/2013

Tsy tokony hiandany na amin’iza na amin’iza ireo mpiasam-panjakana, indrindra ireo lehiben’ny faritra, manoloana ny fanatanterahana ny fifidianana raha araka ny fanehoan-kevitry ny kandidàn’ny MDM, Pierrot Rajaonarivelo. Omaly no nametraka ny taratasy filatsahan-ko fidin’ity farany teny amin’ny Fitsarana manokana momba ny fifidianana ny mpiara-miasa akaiky aminy. Izy no kandida faha efatra nahatafapetraka ny filatsahan-ko fidiny teny amin’ny CES. Tsy tonga teny amin’ny CES tamin’ny fametrahana ny atontan-taratasy filatsahan-ko fidiny ny filoha nasionalin’ny antoko MDM, Pierrot Rajaonarivelo. Arak’izany dian ireo mpiara-miasa aminy akaiky, nahitana ny mpisolovava Willy Razafinjatovo, sy ny dokotera Paul Léon, filoha lefitry ny antoko MDM misahana ny faritanin’i Toliara ary Martial Rakotomalala, filoha lefitry ny MDM ho an’ny faritanin’Antananarivo no nitarika ny delegasiona nametraka ny atontan-taratasy filatsahan-ko fidin’I Pierrot Rajaonarivelo, omaly teny amin’ny lapan’ny HCC Ambohidahy.

Mpikambana vitsivitsy avy ao amin’ny antoko MDM kosa no nanontrona azy ireo tamin’izany. I Pierrot Rajaonarivelo, arak’izany no kandidà faha efatra nahatafapetraka ny atontan-taratasy filatsahan-ko fidina amin’ny fifidianana filoham-pirenena hatao eto Madagasikara. Raha tsiahivina dia efa nahavita izany ny kandidà isany Lahiniriko Jean izay natolotry ny KML sy ny kandidà Hajo Andrianainarivelo ary ny kandidà Ratsiraka Roland.
Hametram-pialàna mialoha ny daty
Raha iverenana ny nisongadina manodidina ny filatsahan-ko fidin’ny kandidà Pierrot Rajaonarivelo dia fantatra fa isan’ny nasongadiny na dia tsy teny amin’ny CES aza ny tenany, ny tsy fitakiany ny amin’ny tsy tokony hisian’ny fiandaniana amin’ireo mpiasam-panjakana, indrindra ireo Lehiben’ny faritra. Araka ny fantatra dia vokatr’ilay disadisa nitranga tany Mahajanga tamin’ny faran’ny herinandro teo tamin’ny fampiasana ny kianja tany an-toerana izay nifanolanan’ny MDM sy ny mpomba ny praiminisitra lefitra Hajo Andrianainarivelo, no nahatonga ity fanehoan-kevitra nataon’i Pierrot Rajaonarivelo ity. Fanehoan-kevitra izay midika fa tsy mankasitraka ny fihetsiky ny lehiben’ny faritra izay ahiana hitongilana amin’ny kandidan’ny antoko eo amin’ny fitondrana na amin’ny fitantanana ny departemanta misy azy ireo ny tenan’i Pierrot Rajaonarivelo.
Ankoatr’izay resaka lehiben’ny faritra izay dia isan’ny nasongadin’ny kandidan’ny antoko MDM ihany koa ny fahavononany hametram-pialana tsy ho mpikambana ao amin’ny Governemantan’ny Firaisam-pirenena. Tsy hiandry ny daty farany izay voatondron’ny tondrozotra momba izany ny tenany, raha araka ny fanambarany. Izany hoe andro maromaro na vitsivitsy mialoha ny enimpolo andro voatondron’ny làlana dia efa hametram-pialana tsy ho mpikambana ao amin’ny Governemanta ny tenany.