Haneho ny hatezerany ny mpanjifa

11/04/2013

Efa nanomboka tamin’ny zoma lasa teo ary mbola nitohy hatry ny omaly ny fatapatapahan-jiro tao Toamasina. Mazava loatra fa mihoatra ny zakan’ny vahoaka ny zava-misy any an-toerana amin’izao fotoana izao. Vokatr’izany dia efa misy araka ny loharanom-baovao avy any an-toerana, ireo mpanjifa izay efa mifanome teny ny amin’ny mety hanatanterahana hetsika hanehoana ny tsy fahafaliana manoloana ity fatapahan-jiro ity.

« Efa tena tsy izy intsony ity ataon’ny jirama ity, hoy ny nambaran’izy ireo. Efa tsy misy fotoanany intsony ny fatapahan’ny herinaratra, tsy atoandro tsy alina fa fatapahana jiro, haizina lalandava no iainan’ny mpanjifa. Tokony hiteny ny jirama raha tsy vitany intsony ny manome fahafaham-po ny mpanjifa ».
Marihina fa araka ny loharanom-baovao dia manakaiky ny roapolo arivo tapitrisa ariary ny trosan’ny orinasa Jirama izay tsy voalohan’ireo biraom-panjakana sy olom-panjakana ambony ary ny oniversiten’i Toamasina mitambatra. Izay banga goavana dia goavana izay no voalaza fa tsy ahafahan’ity orinasa itymanome fahafaham-po ny mpanjifa tsotra izay marihina fa mahavita ny adidiny ao anatin’ny fahantrany sy ny tsy fahampiam-bolany.
Mikotrika hetsika izay kasaina hatao eo anoloan’ny biraon’ny Jirama any an-toerana amin’izao fotoana izao ny mpanjifa. Tanjona ny hampahafantarana ny orinasam-panjakana fa « efa mijaly ny vahoaka, mitaintaintan-dava amin’ny tsy filaminana ny mponina, ary efa mizaka ny tsy eran’ny volany ny mpanjifa amin’ny fandoavana ny faktiora, ka tokony mba omena fahafaham-po, fa tsy ny fanjakana efa tsy mahavita ny adidiny no voky sy migalabona amin’ny volam-bahoaka ao amin’ny jirama ao ». Ao anatin’izay anefa dia mitohy hatrany ny tsy fisian’ny herin’aratra na milaza ny efa miezaka amin’ny fanamboarana ny fitaovana simba sy mamelona ireo fitaovana maty ny teknisian’ny jirama Toamasina, amin’ireo kely hananany sy mba alefan’ny tale jenerelin’ny jirama foibe ho azy. Ny angom-baovao ihany koa no nahalalana fa tsy mihazom-bola sy fitaovana intsony ny jirama Toamasina, fa ny foibe eto Antananarivo avokoa no misahana izany sy mandefa ireo fangatahana tonga eo aminy ho fanamboarana sy filan’ireo sampan’ny jirama tahaka an’i Toamasina.