Betsaka ny kitoatoa

12/04/2013

Nivoaka tamin’ny fahanginany ary namoaka ny marina manodidina ny fomba nanatontosana ny fifidianana izay filohan’ny FFM amin’izao fotoana izao ireo izay nandray anjara tamin’izay fifidianana izany. Isan’izany i Ravonjiarisoanarivoliolona Jean Lucien izay nitondra fanazavana tamin’ny mpanao gazety ny momba ny fihetsika nasehon’ireo mpikambana ao amin’ny FFM nandritra ny fihainoana ireo kandidà tamin’ny famelabelarana nataon’izy ireo.

Araka ny nambaran’ity farany dia tsy feno ny isan’ireo mpikambana tao amin’ny FFM tamin’ny fotoana nanaovan’ny kandidà sasany ny fampahafantarana ny fandaharan’asany teo anatrehan’izany andrim-panjakana izany. Raha araka ny tokony ho izy anefa dia tokony tsy maintsy hiatrika azy ireo hatrany ireo mpikambana rehetra mandritra ny famelabelarana.
Ho an’ity kandidà ity sy ireo namany hafa dia taratry ny tsy fanarahan-dàlana teo amin’ny fanatanterahana ny fifidianana izay ho filohan’ny FFM izany, ary maneho mazava ihany koa ny tsy fahamatoran’ireo mpikambana sasantsasany ao amin’ity andrim-panjakana izay izay heverina fa tokony hahay mihaino ny rehetra mba hahatomombana ny fampihavanam-pirenena nankinina taminy.
Marihina fa nilaza ny hametraka fitoriana eny anivon’ny Fitsarana momba ny ady ifanaovana amin’ny Fanjakana ny kandidà Ravonjiarisoanarivoliolona Jean Lucien sy ireo kandidà hafa izay miombon-kevitra aminy noho ny fahitan’izy ireo ny tsy fanarahan-dàlana tamin’izany fifidianana izay.
Tsara ny mampatsiahy fa omaly no nanao ny fihanihanany tao amin’ny Fitsarana tampony tao Anosy ny filohan’ny FFM, ny Jeneraly Rabotoarison Charles Sylvain. Nisy ny lanonam-pitsarana nandraisana izany fihanihanany izany izay natrehan’ireo mpitondra ambony sasantsasany amin’izao tetezamita izao, notarihan’ny filohan’ny tetezamita. Fantatra ihany koa fa nihaona tamin’ireo avy ao amin’ny FFKM, omaly ny filohan’ny FFM. Tsy fantatra kosa ny votoatin’izany fihaonana izany.