Hiakatra alohan’ny fifidianana

12/04/2013

Tsy maintsy hatao izay hampihenana ny elanelana misy eo amin’ny vidin-tsolika tena izy sy ny vidin’izany eny amin’ny mpanjinjara, raha araka ny fanazavan’ny minisitry ny Solika, omaly. Mialoha ny fifidianana hatao eto amin’ny firenena no tsy maintsy hanatanterahana izany. Hisy arak’izany ny fampiakarana ny vidin-tsolika eto amintsika.Tranga izay hisy fiantraikany mivantana amin’ny raharaham-pifidianana, indrindra ny fizotran’ny fampielezan-kevitra. Mbola mahatratra 500 ariary amin’izao fotoana izao ny elanelana misy eo amin’ny vidin-tsolika tena izy sy ny vidy ivarotana izany vokatra izany eto amintsika, raha araka ny fanazavana nataon’ny minisitra Marcel Bernard. Mbola araka ny fanazavan’ity mpikambana ao amin’ny governemanta ity ihany dia efa roa volana lasa izay no efa tokony natao ny fampiakarana tsikelikely ny vidin’ny solika manerana an’i Madagasikara.

Noho ny zava-nisy teto amin’ny firenena vokatry ny fandravaravan’ny rivo-doza tany amin’ny ilany atsimon’ny Nosy anefa dia tsy afaka nimpihantra izany fampiakarana ny vidin—tsolika izany ny komity misahana izany. Iaraha-mahalala anefa, araka ny fanazavan’ity tompon’andraikitra ity ihany fa nisy foakarany ny vidin-tsolika teo amin’ny sehatra iraisam-pirenena noho ny toetr’andro sy ny fiakaran’ny filàna momba izany eo amin’io sehatra io.
Hisy fiantraikany amin’ny fiainam-bahoaka
Izany rehetra izany ilazana fa tsy azo ihodivirana ny fampakarana ny vidin-tsolika eny amin’ny mpanjinjara. Tsy maintsy hatao tsikelikely anefa izany araka ny fanamarihan’ny minisitra Marcel Bernard. Tsy maintsy hatao mialoha ny raharaham-pifidianana eto amintsika ihany koa mba tsy hiantraika mivantana amin’ny fiainam-bahoaka.
Tsara ny mampatsiahy fa antony iray mamaritra ny vidim-piainana eto amintsika ny vidin-tsolika. Izany hoe arakaraka ny fiakaran’izany no hiakaran’ny vidim-piainana ihany koa. Arak’izany dia tsy isalasalana ny hiakaran’ny vidin’ireo entana ilain’ny mponina an-davan’andro mialoha ny fanatanterahana ny raharaham-pifidianana eto amintsika. Tranga izay hanamora ny fampielezan-kevitra ho an’ny ampahany amin’ireo kandidà, fa hanasarotra izany kosa ho an’ireo ampahany hafa. Satria ho mora ho an’ireo kandidà manan-katolotra ny hitarika ny sain’ireo vahoaka sahirana noho ny fiakaran’ny vidim-piainana. Ho voailika mora fotsiny kosa ireo kandidà tsy manan-katolotra mandritra ny propagandy.