Mitaky ny fialàn’ny tale jeneraly ireo mpiasa

12/04/2013

Nitondra fanazavana mikasika ny anton’ny fitokonana izay ataon’izy ireo amin’izao fotoana izao ireo mpiasa mitokona ao amin’ny SMMC any Toamasina amin’izao fotoana izao. Nandritra ny fihaonana tamin’ny mpanao gazety izay nokarakarain’izy ireo, omaly tany an-toerana no nanaovan’izy ireo izany fanambarana izany.

Arak’izany dia nambaran’ireo mpiasa mitokona fa mpiasam-panjakana izy ireo. Nambaran’izy ireo ihany koa fa manao izay danin’ny kibony amin’ny fanaovana jadona sy fanitsakitsahana ny zon’ireo mpiasa eo ambany fiadidiana ny tale jeneralin’ity orin’asa iasan’izy ireo ity. Antony maro no hanazavan’izy ireo izany. Isan’izany ny momba ireo tombontsoan’ny mpiasa sasantsasany izay iniana tsy homena. Eo, ohatra, ny “prime de retraite” ho an’ireo mpiasa miisa 44 nivoaka nisotro ronono ny faran’ny taona 2012 teo araka ny naoty 058/SMMC/DG/2011. Araka ny fanazavan’ireo mpiasa mitokona dia ary namarininy tamin’ny alalan’ireo antontan-taratasy manamarina izany dia tsy nahazo ny tombontsoany tahaka ny mpiasa rehetra teo anivon’ny seranan-tsambo izy ireo. Tombon-tsoa izay voafaritra araka ny “convention collective” izay mbola mihatra hatrany eo anivon’ny MICTSL sy ny SPAT. Eo ihany koa ankoatr’izay ny “13eme mois” : Voalaza fa mpiasa miisa 50 teo no nomena “0Ar.” nefa tsy nahazo sazy akory tamin’ny asany. Ny 75% ny mpiasa kosa no tsy nahazo ny “prime de benefice” izay fandray isaky ny volana martsa. Mpiasa miisa 500 eo ho eo kosa, izany hoe ny 70%n’ ny mpiasa kosa no nampidinina grady araka ny fanapahan-kevitra nataon’ny tale jeneraly

Fahaverezam-bola tsy nisy trano vaky

Ankoatr’ireo rehetra ireo dia isan’ny nitondra ny heviny mikasika ilay raharaha fahaverezam-bola tao amin’ity orinasa ity ihany koa ireto mpiasa mitokona ireto. Raha tsiahivina dia teo anelanelan’ny 28 desambra 2012 ka hatramin’ny 02 janoary 2013, no nisian’izany fahaverezam-bola izany kanefa tsy nahitana “coffre” sy varavarana vaky akory tao amin’ny trano fiasana. Mampametram-panontaniana azy ireo, araka ny fanamarihana nataony ity toe-draharaha ity. Ireto avy no anton’izany: fantatra fa mbola mandray karama an’ilay mpiambina izay miandry fitsarana am-ponja hatramin’izao. Ireo mpiasa mianadahy mpihazona ny fanalahidin’ny fitahirizam-bola anefa notapahana ny karamany. Na dia tsy voasazy akory noho ity raharaha ity. fantatra ihany koa fa tamin’ny 28 desambra, fotoana niasana farany ny taona 2012, dia namporisihan’ireo mpiambina hivoaka ny birao izy mianadahy ireto raha mbola nandamina ny vola tahaka ny fanaony. Ny alarobia 02 janoary 2013 anefa dia very ny vola 18 tapitrisa ariary tao amin’ny “caisse depenses” sy ny vola 89 tapitrisa ariary tao amin’ny “caisse recettes”. Ny “coffre” sy ny trano anefa tsy vaky afa-tsy ny valin-drihana nahitana dian-tanana sy dian-tongotra.
Marihina fa tsy nanao tatitra ny fandehan-javatra rehetra ireo mpiambina niasa tamin’io fotoana io. Izy mianadahy ireto anefa nanomboka ny 14 janoary teo dia notapahan’ny tale jeneraly ny karamany, nefa tsy mbola nisy “CODIS” natao akory manasazy azy ireo.