Manondro molotra ny HAT

13/04/2013

Nampahafantarina omaly ny ”Dinan’ny tany tan-dàlana”. Ny fikambanana CAEED na ny Fifandraisana sy hetsika ho an’ny fampiharana ny tany tan-dàlana no angady nananana sy vy nahitana ity atontan-kevitra ity. Hampahafantarina sady hatolotra ho soniavin’ireo kandidà amin’ny fifidianana filoham-pirenena ny dinan’ny tany tan-dàlana alohan’ny hirosoana amin’ny famaritana ny asa hatao amin’ny fampiharana azy, araka ny vinavinan-kevitr’ireo izay namolavola azy. Hatsika izay manondro mazava ny kileman’ny fitondrana misy amin’izao fotoana izao. Nampahafantarina ny be sy ny maro, omaly, ny “Dinan’ny tany tan-dàlana” izay heverina fa hatolotra ireo ho soniavin’ireo kandidà hilatsaka ho fidina filoham-pirenena.

Ny fikambanana CAEED na ny Fifandraisana sy hetsika ho an’ny fampiharana ny tany tan-dàlana, araka ny fampanantenana efa nataon’izy ireo tamin’ny 21 febroary farany teo no namolavola ity atontan-kevitra ity. Araka ny fanazavana nandritra ny fampahafantarana izany dia ny famahana ny krizy ary ny tsy hiverimberenan’izany krizy izany no antom-pisian’ity “dinan’ny tany tan-dàlana “ ity. Marihina mahakasika ireo kileman’ny fitondrana amin’izao fotoana izao avokoa ny votoatin’ity tahirin-kevitra ity.
Ahitana loha-hevitra miisa 11 ao amin’ity tahirin-kevitra na “Dinan’ny tany tan-dàlana” ity. Isan’ny voaresaka amin’izany ny amin’ny tokony hisian’ny fifidianana madio sy malalaka ary ankatoavin’ny rehetra. Voaresaka ihany koa ny amin’ny tokony hisian’ny mangarahara amin’ny fampiasam-bolan’ireo kandidà amin’ny fifidianana eto amin’ny firenena. Ankoatr’ireo dia isan’ny soso-kevitra hita ao amin’ity “Dinan’ny tany tan-dàlana” ity ihany koa ny momba ny fanampariaham-pahefana. Ao anatin’izany dia ny vahoaka mihintsy no mamaritra ny fampiasambolan’ny fanjakana sy manara-maso akaiky ary mitaky ny tatitra momba izany avy amin’ireo tompon’andraikitra isan’isany avy.
Nambaran’ny mpikambana ao amin’ny CEED nandritra ny fampahafantarana ny “Dinan’ny tany tan-dàlana” fa taorian’iny fampafantanarana natao omaly iny dia ny fandresen-dahatra ireo kandidà mba hanao Sonia izany indray no tanjon’izy ireo manaraka. Aorian’izay kosa va hiroso amin’ny fikarohana ny fomba hampiharana azy.