Nitohy ny fidinana an-dalambe tany Toamasina

31/10/2012

Nirotsaka teny an’arabe indray, omaly maraina, ireo vahoaka an’arivony miara-dàlana amin’ny hetsika “tsisy miala aketo niany” any Toamasina. Mbola ny fitakiana ny fandohavana 6 tapitrisa ariary isan’olona ho an’ireo mpiasa tapitra fifanarahana tao amin’ny tetik’asa Ambatovy no anton’izany fidinana an-dalam-be izany. Niainga tao amin’ny kianja mitafo Soavita izany filaharana izany ary nihazo ny biraon’ny tetik’asa Ambatovy, talohan’ny nandalovany manoloana ny biraon’ny Faritra Antsinanana. Manome fe-potoana hatramin’ny 5 novambra ireo mpitokona mba handraisana

fanampahan-kevitra manoloana ny fitakian’izay ireo. Raha dila io fe-potoana io dia milaza ny hanakatona ny tetik’asa Ambatovy izy ireo ary hanesotra amin’ny toerany ny Lehiben’ny Faritra izay tondroin’izy ireo ho tsy miraharaha ny olan’ny vahoaka.Naneho ny heriny ny hetsika “tsisy miala aketo niany”, tany antampon-tananan’I Toamasina. Vahoaka tsy latsaky ny 2000, izay ahitana ireo mpiasa lany fifanarahana tao amin’ny tetik’asa Ambatovy nomban’ny fianankavian’izy ireo no indray nirotsaka an-dalam-be, omaly tany an-toerana. Hetsika izay niainga teny amin’ny kianja mitafo ao Soavita, nipaka teny amin’ny biraon’ny tetik’asa Ambatovy ary nihazo ny biraon’ny faritra Antsinanana avy eo. Mitaky ny handoavan’ny tetik’asa Ambatovy ny vola 6 tapitrisa ariary isaky ny mpiasa lany fifanarahana tamin’ity tetik’asa ity ireto mpanao fihetsiketsehana ireto, izay nanome fem-potoana hatramin’ny 5 novembra ho avy izao. Raha dila io fe-potoana io ka tsy mahazo izany izy ireo dia nilaza ny hanao hetsika goavana ho fanakatonana ny Tetik’asa Ambatovy sy hanala amin’ny toerany ny Lehiben’ny Faritra Antsinanana. Tondroin’izy ireo ho tsy mijery ny tombontsoan’izy ireo ity farany. Marihina fa ankoatry ny fitakiana io vola avy amin’ny Tetik’asa Ambatovy io dia mitaky ny fanonerana ny vidin’ny tany izay nalain’ity tetik’asa ity, ka nametrahana ireo fantsona mitondra ny vokatry ny orin’asa mihazo an’i Toamasina ihany koa ireo mpanao fihetsiketsehana. Ary mbola isan’ny votoatin’ny fitakian’izy ireo ihany koa ny hamoahana ny mangarahara mikasika ireo fanodikodinana isan-karazany izay mitranga any amin’ity tananan’i Toamasina ity amin’izao fotoana izao, indrindra izay efa nametrahan’izy ireo fitoriana teny amin’ny fitsarana.
Hetsika am-pilaminana
Marihina fa tany amin’ny 8 ora sy sasany maraina, omaly dia efa tafapaka teny amin’ny faritra manoloana ny biraon’ny tetik’asa Ambatovy tao Toamasina ireo mpanao fihetsiketsehana. Ity orin’asa ity izay efa nampody mialoha ireo mpiasa tao aminy ary efa notemerin’ny mpitandro filaminana avy amin’ny Emmo-rég. Fotoana vitsivitsy taorian’izay dia tonga teny an-toerana ny lehiben’ny Distrikan’i Toamasina I, Ravelomanarivo Jean Jacques, izay nampahafantatra ny “requisition générale” laharana faha 10/12/Distr/TOA/OP izay noraisiny manoloana ity fihetsiketsehana ity. Nomarihan’ny lehiben’ny distrika tamin’ny fampahafantarana nataony fa “…ny fanatanterahan’ny mpitandro ny filaminana ny réquisition dia tsy midika ho fampiasana fitaovam-piadiana; kanefa raha ilaina izany dia miankina amin’ny fahitan’ny mpitarika ny Emmo-Reg eny an-toerana ihany, ka tsy maintsy hanaovana fampitandremana mialoha”.

Araka ny fanazavan’i Rakotomalala Henri (Riri Be), izay mpitarika ity fihetseham-bahoaka ity dia “tsy sarotra ny famahana izao raharaha satria ny 3 tapitrisa dolara amin’ny 25 tapitrisa dolara nomen’ny tetikasa ihany dia vita ny raharaha ary mijanona ny fitokonana”.
Marihina fa taorian’ny fandalovana teo anoloan’ny biraon’ny tetikasa Ambatovy dia nihazo ny biraon’ny faritra indray ireo mpanao fihetsiketsehana. Taorian’ny kabary nataon’ny Riri Be nilaza ny hetsika hataon’izy ireo sy ny fijerena ny olan’ny tanoran’i Toamasina, dia samy namonjy fodiana am-pilaminana ireo mpanao fihetsiketsehana.
Marihana ihany koa fa nilaza ny mbola hanohy izao fidianana an-dalambe izao ireto mpitokona any Toamasina ireto ary nandeha ihany koa ny feo izay milaza fa hanatevin-daharana azy ireo amin’izany ireo mpianatra mitokona avy any barikadimy.