Lasa lamaody “manaram-penitra”

13/04/2013

Mbola misy sahy manindry sy mampihorohoro ihany ireo mpikambana sasany ao amin’ny fitondrana tetezamita na dia amin’izao fotoana efa azo lazaina fa “fialany aina” izao aza.

Efa tsy mahataitra ny olona intsony moa izany fihetsika mamohehitra ataon’ny manampahefana izany satria efa zary fomba fiainan’izy ireo amin’ny andavan’androny ny manao tsindry aloka ny madinika, eny fa na dia amin’ny resaka tsy dia manao ahoana akory aza dia hitan’izy ireo ampiasana ny tsindry bokotra isan-karazany.
Tranga iray amin’izany ohatra omaly maraina teny amin’iny làlana mihazo an’Ambohibao iny. Raha tsy nahazo làlana ity fiara “DACIA Nº 8---1 TAJ” iray dia sahy nanao vava be sy nandrangaranga karatra tamin’ilay mpamily ilay taxi-be tsy nanome làlana azy ary nilaza ny hisintona ny “papier sy ny permis”-ny. Ny nampalahelo dia saika hodomin’izy ireo mihitsy ilay fiara tsy nanome làlana azy. Ny tsy fantatr’ireto olona miseho azy ho tompon’ny hery sy ny fahefana ireto anefa dia efa miandry azy ireo ny olona. “Aleo hivoaka eo” hoy ny tsilin-tsofina re tao anatin’ilay taxi-be, “izany no manampahefanan’HAT ” hoy ny hafa.
Toe-tsaina tahaka izany ve no hitondrana ity firenena ity ? Sady hita izao fa izy no diso dia maninona raha mba mangataka fotsiny hoe “mba omeo kely eo e!”, dia vita fa tsy ianao indray no manao gisa lahy mangala-ketsa. Sa efa lasa toetra raiki-tampisaka ao anatinareo mihitsy ny fihamboamboana sy ny fanaovana tsinontsinona ny vahoaka madinika? Maro tokoa ny fihetsika mampalahelo tahaka izany eny amin’ny fiarahamonina rehetra eny, na eny an-dalam-be sns…
Tandremo ihany lehiretsy ny zavatra atao fa ny vahoaka anie “ tsy folaka fa mandefitra ”, nefa izany fandeferana izany iaraha-mahalala fa misy fetrany ihany. Toy ny zava-drehetra tsy maintsy misy fiafarany. Ka ovao ny famindra dieny izao sao ho ratsy fiafarana io fahefana kely mandalo eo am-pelan-tananao io. Sady tokony ho fantany ihany koa fa tsy voafidim-bahoaka izy ireny fa nangala-pahefana.