Voaantso teny amin’ny zandary ny mpanao gazety

15/04/2013

Tafapaka any amin’ny mpanao gazety ankehitriny ny fanadihadiana ataon’ny mpitandro filaminana avy ao amin’ny Zandary any Toamasina mahakasika ilay raharaha ifanolanan’ny samy manamboninahitra tao amin’ny toby miaramila 1/RM3 any an-toerana. Nantsoin’ny mpanao fanadihadiana ireo mpanao gazety roa tany an-toerana. Ny Kalonely lehiben’ny Toby 1/RM3 Toamasina teo aloha no mpitory amin’izao raharaha izao. Vavolombelona kosa no niantsoana ireo mpanao gazety.

Amin’ny maha tsiambaratelo ny fanadihadiana tontosain’ny mpitandro filaminana dia tsy fantatra mazava tsara izay votoatin’ny fiantsoan’ny zandary ireo mpanao gazety roa tany Toamasina ny faran’ny herinandro teo. Tsy iza moa ireo mpanao gazety ireo fa i Fatema Fanjarisoa, avy amin’ny RNM/TVM any Toamasina sy ny mpanao gazety solon-tenan’ny “groupe Ultima-Media” ao Toamasina, Sabotsy Jose. Fantatra, araka ny angom-baovao ihany fa manodidina ilay disadisa nitranga tao amin’ny toby 1/RM3 no anton’ny nampanantsoin’ny zandary azy ireo teo anivon’ny “groupement” ny zoma tolakandro teo sy ny omaly alahady tamin’ny 10 ora maraina.

Marihina fa efa nampoizin’ny maro ihany izao fiantsoana ireo mmpanao gazety izao satria efa maro dia maro ny resaka nandeha ny amin’ny tsy fahafalian’ireo manamboninahitra tao amin’ny Toby 1/RM3 Toamasina noho ny fivoahan’ny taratasy izay heverin’izy ireo fa tsiambaratelo teny amin’ny gazety. Tsy inona io fa ila “message radio secret confidential” mikasika ireo basin’ny tafika (MAC 49 sy FAC…) izay voamarina fa nanaovana fakana an-keriny tao Toamasina. Teo ihany koa ny olana teo amin’ny jeneraly Rasamoelina lehiben’ny tobin-tafika Toamasina teo aloha sy ny kolonely Tombovelotetsy an-daniny ary ny kolonely Boanahidy tetsy an-kilany izay niteraka olana “goavana” eo anivon’ny manamboninahitra sy ny manamboninahitra lefitra ao Toamasina.

Vavolombelona

Tsy vitsy ireo mpanao gazety any an-toerana no nametraka izao fanaovana fanadihadiana ny mpanao gazety izao ho fanosihosena ny tsiambaratelon’ny loharanom-baovao satria ny loharanom-baovao nafahan’ny mpanao gazety nahafantatra ny fisian’ilay “tract” niely sy ny fivoahan’ilay “secret confidentiel” avo ao amin’ny tafika no tsy maintsy niompanan’ny fanadiadiana. Ny kolonely Tombovelo no manao sonia ny fitoriana izay fitoriana olon-tsy fantatra (plainte contre X) saingy ny mpanao gazety no nokendrena. Ireto farany izay nokilasiana ho “vavolombelona” nandritra ny fanadiadiana azy. Hatreto anefa dia tsy nisy ny “droit de reponse” nataon’ny kolonely Tombovelo, raha heveriny fa diso na tsy marina ny vaovao navoakan’ireo mpanao gazety.
Midika ihany koa izao trangan-javatra eo anivon’ny tafika izao, fa tsy mahafehy ny olona ao aminy sy ny fakam-baovao ao anatiny ary ny fifehezana ny tsiambaratelon’ny tafika ao aminy intsony ireo lehiben’ny tafika ao Toamasina. Ankoatra izay anefa, efa mahalala ny zava-misy marina amin’ity raharaha ity ny minisitry ny fiarovana sy ny lehiben’ny tafika Malagasy, ka andrasana izay hetsika ataon’izy ireo. Marihina fa araka ny loharanom-baovao dia saika tonga dia notazonina an-tranomarizina ireo mpanao gazety, raha vao miatrika ny fanadiadiana azy. Manamarina izany ny tenin’ireo zandary teo anivon’ny “groupement” faritra atsinanana nanao ny fanadiadiana ny amin’ny tsy tokony nitondran’izy ireo mpisolovava mandritra ny fakana am-bavany azy. Nitondra mpisolovava anefa izy ireo ka rava maina ny tetika rehetra nomanina.