Mbola tsy voavaha ny olan’ny delestazy

15/04/2013

Nampanantena ny hamaha ny olana misy eo amin’ny famatsiana herinaratra any Toamasina ao anatin’ny 48 ora ny tale jeneralin’ny Jirama Rasidy Désiré. Nisongadina izany nandritra ny fivoriambe niarahan’ireo izay voakasik’ity raharaha Jirama Toamasina ity, izany natao tao amin’nhy hotely Le Miramar tamin’ny asabotsy teo. Nandray anjara tamin’ity fihaonana ity ny “comité des sages” tao Toamasina notarihan’i Vony Ferdinand. Teo ihany koa ny avy amin’ny Jirama nahitana ny tale jeneraliny Rasidy Desire sy ny tale kebinetran’ny minisitry angovo Lehova Augustin. Nandray anjara tamin’ny dinika ihany koa ny orinasa Ambatovy notarihan’i Marolahy Pierre. Nanao ny fifampanantonana sy nitarika ny ady hevitra kosa ny sekretera jeneralin’ny faritra Atsinanana Randriamaharitra Philibert. Rah any zava-nisy tamin’ny faran’ny herinandro teo dia tsy mbola tanteraka ny fampanantenan’ny Tale jeneralin’ny Jirama

Avy hatrany dia nivantana ny “comite des sages” izay nilaza fa “mahatonga ny olana maro eto Toamasina ny tsy fahombiazan’ny jirama sy ny tolotra omeny mpanjifa. “Voalohanareo jirama avokoa ve ny fahasimbana nateraky ny olana nataonareo? Finaritra ve ianareo Jirama fa nahafaty ramatoa be 81 taona ny herin’aratra izay ampilafilainareo?”. Isan’ny fanontanian’ireo nandray fitenanana ireo.
Araka ny nambaran’ny tale jeneralin’ny Jirama Rasidy Desire, dia “manana olana ara-bola ny Jirama ankehitriny. Betsaka amin’ny mpanjifa hoy izy, no tsy mahavita ny adidiny. Isan’izany ny mpanjifa tsotra sy ny fanjakana. “Aoka koa tsy adinintsika fa efa-taona tao anatin’ny krizy isika ka miantraika amin’ny Jirama ihany koa izany noho ireo mpanampy ara-bola azy tsy nanao izany intsony, eo koa ny fahantran’ny Malagasy ary ny tsy fahampiam-bolan’ny fanjakana”, hoy ny tale jeneralin’ny Jirama. Nihitatra koa anefa ny fanazavany ka tonga amin’ny fanomezan-tsiny ireo mpitondra teo aloha rehetra amin’ny politika ara-angovo noraisin’izy ireo nandritra ny fitondrany avy, izay tsy mifanaraka intsony amin’ny filan’ny mpanjifa ankehitriny. Raha ny angom-baovao natao dia fantatra fa an-jatony tapitrisa ariary ny trosan’ny Jirama amin’ny fanjakana, eo ireo vidin-jiro sy rano tsy voaloha indrindra ny an’ny oniversite sy ny biraom-panjakana ary ny minisitera, eo koa ny vola alain’ny fanjakana ao aminy ka isan’izany, araka ny angom-baovao ihany, ny nanamboarana ireo “cité fitiavana” ao Toamasina.

“Tsy te-ahalala izay olanareo Jirama izahay vahoaka sy ny mpanjifa, mila miverina ny herin’aratra, mila tsy tapaka ny jiro, miezaha mamahana ny olanareo ianareo fa tsy miala bala amin’ny fanaratsiana ny hafa sy ny politikan’ny mpitondra teo aloha ary manilika ny olana amin’ny krizy, nefa ianareo ankehitriny mihintsy no tsy mahavita azy sy mpihinam-bolam-bahoaka fotsiny…”, hoy kosa i Telolahy Felix, isan’ny mpikamba ao amin’ny “comite des sages”.
Nambaran’Atoa Rasidy Desire anefa fa “tsy misy atahorana intsony ny herin’aratra ho anareo eto Toamasina, fa efa manomboka ny fanamboarana rehetra ireo fitaovana simba. Tsy maintsy ho voavaha ao anatin’ny 48 ora ny olana ary ho tratra ny 19MW ilaina alohan’izao amin’ny famahana ny olan’ny delestazy efa naharitra herinandro ho an’i Toamasina”.

Tsy ampy ny herinaratra

Marihana fa 22 MW ny filàn’i Toamasina amin’ny ora maha betsaka ny filàna “heures de pointe”. Ny herin’aratra misy anefa raha vita ireo fitaovana namboarina ireo dia 16 MW fotsiny. 12 MW avy amin’ny Enelec, ny 04 MW avy amin’ny Jirama “Tamatave IV”. Ny volobe Toamasina II mbola mety hahazoana 06 MW mameno ny herin’aratra ho 19 MW dia mbola miandry fitaovana. Raha ny zava-nisy ny sabotsy alina sy ny alahady na teo aza ny tokin-dRasidy Desire, dia mbola betsaka ny fokontany tapaka herin’aratra, isan’izany ny tao Mangarano I sy II, Ambolomadinika atsimo, Mangarivotra atsimo, Cite Haras, Morarano, Ambalakisoa, Tanambao verrerie, Ambohijafy avaratra…ary Tanamborizano.
Isany olan’ny herin’aratra mahazo an’i Toamasina sy ny manodidina azy tao ho ao io, dia ny trosa ben’ny jirama tsy voalohany amin’ny orin’asa Enelec efa nanomboka ny taona 2010 hatramin’izao. Araka ny angom-baovao na tsy nilaza ny sandam-bola aza Atoa Abdoul Rassoul tale jeneralin’ny Enelec Madagasikara, fa am-polony arivo tapitrisa ariary maro ny volany tsy naloan’ny jirama, isany antony nanapahan’ny Enelec ny fanomezana ny tolotra tao anatin’ny fifanarahana mahatratra 22 MW, izay mbola nisy fifanarahana vaovao indray nataon’Atoa Rasidy Desire sy Atoa Abdoul Rassoul fa tsy maintsy tratra indray izany ny volana jona 2013 izao hahafahana miatrika ny fifidianana ny volana jolay sy ny fampielezan-kevitra manomboka ny 24 jona; efa hita sahady anefa fa tsy ho tratra izany raha ny zava-nisy ny sabotsy teo, satria navoakan’Atoa Abdoul Rassoul mivantana fa “tsy izahay no tsy te-hanome vokatra tsara sy ampy ny jirama, fa ny olana ara-bolanay noho ny fahaloavana ny trosanay, no mitatao aminay ankehitriny, nefa ireo fitaovana koa efa manomboka mila fanamboarana ny ankamaroany ary any afrika atsimo izahay no manafatra ny fitaovana rehetra”.

Ankoatra izay, dia nitrangana fitokonana nanimbana fananan’olona tao Barikadimy ny zoma alina teo vokatra ity herin’aratra ity ihany. Fiara 03 no potika; nirefodrefotra ihany koa ny tifi-danitra sy nidobodoboka “grenades lacrymogenes” ny Emmo-Securite. Tsy nisy aloha ny mpianatra nosamborina, ireo simba fananana ihany koa tsy nisy nitory. Efa mandeha koa ny fanangonan-tsonian’ny “ACT: Action Citoyenne Toamasina” mikasika ity olana ara-herin’aratra ity hatrany; ny fitokonan’ny mpanjifa koa anio hatahorana mafy...