Lalao Ravalomanana no kandidan’ny ankolafy

15/04/2013

Nandritra ny fidirany an-telefaonina tao amin’ny fivoariana tao amin’ny Magro ny asabotsy teo no nanambaran’ny filoha teo aloha fa misy mitetika ny ho kandidà amin’ny fifidianana filoham-pirenena ny sasany tamin’ireo avy amin’ny ankolafy tarihany. Tamin’izany ihany koa no nanambaran-dRavalomanana Marc fa amin’ity herinandro ity no hilazany fanampahan-keviny momba ny fandraisana na tsia anjaran’ny ankolafy tarihiny amin’ny fifidianana. Re anefa tamin’ny ora farany fa Rtoa Lalao Ravalomanana no voatendry ho kandidan’ny ankolafy. Raha voalàza teo aloha fa amin’ity herinandro ity no hilaza ny fanampahan-keviny mikasika ny fandraisana anjara na tsy amin’ny fifidianana ny ankolafy Ravalomanana, dia fantatra izao fa tena andray anjara izy.

Ramatoa Lalao Ravalomanana no voatendry ho kandidan’ny ankolafy. Tsara ny mampatsiahy fa lasa any Afrika antsimo hatramin’ny faran’ny herinandro teo ireo avy amin’ny ankolafy Ravalomanana. Araka ny nambaran’izy ireo teny am-piaingana hihazo an’ity firenena uty dia ny hifampidinika amin’ny filoha teo aloha mikasika ny fiatrehana ny fiainam-pirenena no anton-dian’izy ireo any Afrika Atsimo. Tetsy an-danin’izany anefa, nanambara ny filoha teo aloha, nandritra ny fidirany tamin’ny hetsika tao amin’ny Magro Behoririka ny sabotsy teo fa misy te-handresy lahatra azy amin’ny fanendrena kandidà amin’ny fifidianana filoham-pirenena ny sasany amin’ireo delegasiona nankany Afrika Atsimo ireo. “Maika hanao fifidianana ny sasany satria raha tsy manao fifidianana isika dia hanana asa izy ireo”, hoy indrindra ny nambaran’ny filoha teo aloha.
Saika tsy hanolotra kandidà
Marihina fa nilaza ny tsy hanaiky ny fandresen-dahatra hataon’ireo delegasiona hihaona amin’ny any Afrika atsimo ny filoha teo aloha. Tsy manaiky izany ny tenako, hoy izy. “Aza matahotra ianareo hoy izy fa izay hahasoa ny vahoaka no atao. N’inon’inona fandresendahatra atao aty amiko rehefa tsy mahasoa ny vahoaka dia tsy ilaina. Rehefa manao fifidianana isika hoy ny filoha Ravalomanana Marc dia tsy maintsy mandresy. Mila fahasahiana sy fahavonona izany ary mila manakina amin’ny Andriamanitra izany”, hoy hatrany ny filoha teo aloha Ravalomanana Marc. Tsiahivina fa hatreto dia mbola mitana ny heviny ny amin’ny tsy hanolorany kandidà amin’ny fifidianana filom-pirenena ny filoha teo aloha raha tsy efa tanteraka ny fampodiana azy an-tanindrazana. Nilefitra ihany anefa ny lehilahy, saingy tsy ny iray tamin’ireo solotena nihazo an’I Afrika atsimo no notendreny fa ny vady andefimandriny.
Tsahivina rahateo moa fa araka ny fanambaran’ny filoha Ravalomanana tamin’ny asabotsy teo ihany dia handray anjara mivantana amin’ny fanampahan-kevitry ny ankolafy Ravalomanana i Ramatoa Lalao Ravalomanana. Toy izao indrindra ny tenin-dRavalomanana izay manamafy ny toeran’i Lalao Ravalomanana amin’ny fanendrena izay ho kandidà raha hisy izany. “Omaly dia nivory tao Bel’air ny fikambanana sasany, ary mihevitra fa ho tendrena eo ny kandida. tsy manaiky izany ny tenako fa mankanesa any amin’i Neny”. Marihina fa raha araka ny fifanarahana tamin’ny fampodiana an-tanindrazana ny vadin’ny filoha teo aloha dia tsy tokony hikasikasika ny resaka politika mihitsy ny tenany. Niova anefa izany ny fipetraky ny toe-draharaha ka miandry ny ho tohiny ny rehetra.