Hatao tolo-bidy iraisam-pirenena

16/04/2013

Miandry ny famoahan’ny Fitsarana manokana momba fifidianana (CES) amin’ny fomba ôfisialy ny anaran’ireo kandidà hifaninana amin’ny fifidianana filoham-pirenena ny fanombohana ny dingana amin’ny fanontana ny vatom-pifidianana tokana. Hatao amin’ny alalan’ny famoahana tolo-bidy iraisam-pirenena ny fanatontosana izany, araka ny nambaran’ny filohan’ny CENI-T Atallah Béatrice. Afaka folo andro fara-fahakeliny, izany hoe tsy ho vita alohan’ny 28 avrily ny fanontana ny vatom-pifidianana tokana ho an’ny fifidianana filoham-pirenena. Izay no azo hamintinana ny fanazavana nataon’ny filohan’ny CENI-T, Atallah Béatrice, mahakasika ny vatom-pifidianana tokana izay voafaritry ny lalam-pifidianana.

Araka ny fanazavan’ny filohan’ny Vaomieram-pirenena mahaleotena momba ny fifidianana dia miandry ny famoahan’ny Fitsarana manokana momba ny fifidianana na ny CES (Cour électorale speciale) ny anaran’ireo kandidà nahazo ny fankatoavana amin’ny fifidianana filoham-pirenena ny fanombohan’ny dingana amin’ny fanotana izany vato tokana izany. Nomarihany anefa fa hatao amin’ny alalan’ny tolo-bidy eo amin’ny sehatra iraisam-pirenena ny fanotana ny vatom-pifidianana tokana mba ialana amin’ny mety ho fiparitahan’ny vatom-pifidianana sandoka. An-koatr’izay dia nambaran’ity tomponandraikitra ity ihany koa avy amin’ireo vola izay nifanarahana tamin’ireo mpiara-miombonantoka amintsika eo amin’ny fanatanterahana ny fifidianana no ho enti-manatontosa izany fanontana ny vatom-pifidianana tokana izany. Efa nisy hoy izy, ny drafitra mety hahafahana miara-miasa amin’ny firenena Afrikanina tatsimo amin’ny famaritana ny taratasy hampiasaina amin’izany. Mety ho ao amin’io firenena io ihany arak’izany no hatonta ny vatom-pifidianana tokana.
Tsara ny manamarika fa aorian’ny famoahan’ny CES ny anaran’ny kandidà hifaninana ihany koa vao ho voafaritra mazava tsara ny teti-bola hanaovana ny vatom-pifidianana tokana. Mazava loatra ihany koa fa amin’izay fotoana izay vao hivoaka ny tolo-bidy iraisam-pirenena momba ny fanotana ity vatom-pifidianana ity.
Marihina fa halaina tahaka amin’ny endriky ny vatom-pifidianana tokana efa nisy nampiasa tany amin’ny firenen-tsamihafa tany ivelany tany ny endriky vatom-pifidianana tokana mety hampiasaina amin’ny fifidianana filoham-pirenena eto Madagasikara. Nambaran’ny filohan’ny CENI-T fa ny izay endrika tsy nahitana fanankianana maro loatra tany aivelany taany no halaina hatao ohatra amin’izany. Aorian’izany dingana rehetra izany kosa vao hiroso amin’ny fanabeazana ny mpifidy amin’ny fampiasana ny vato tokana amin’ny fifidianana ny CENI-T.