Hisy fepetra manokana

16/04/2013

Handray fepetra manokana sy paik’ady mikasika ny fitandrovana ny filaminana ny Zandrary sy ny polisy ary ireo miaramila amin’ity herinandro ity satria ity no « semaine décisive » raha ny lafiny ara-politika no resahina.

Mety hisy ireo mikononkonona fanakorontanana ho an’ny fanatanterahana ny fifidianana, hoy ny fanambaran’izy ireo tamin’ny fivoriana isan-kerin’andro notanterahin’ireo tomponandraiktra ambony amin’ny fitandroana ny fandriampahalemana sy ny filaminam-bahoaka (Polisy-Tafika-Zandary). Ankoatr’izay dia nambara ihany koa fa hamoaka « code de conduite » iraisana ho an’ny mpitandro filaminana rehetra (Tafika, Zandary ary Pôlisy) amin’izao fotoam-pifidianana izao, ankoatrin’ny « code de conduite » efa ananan’ny vondron-kery tsirairay ny mpitandro filaminana.
Mikasika ny fitandrovana ny filaminam-bahoaka sy ny fandriampahalemana mialoha, mandritra ary aorian’ny fifidianana dia manamafy hatrany ny mpitandro filaminana fa andraikitra manokana no tanterahina ka ilàna famatsiam-bola manokana, mitovy amin’ny « sécurisation fin d’année ». Ny fanatanterahana fifidianana toy izao dia tsy tafiditra ao anatin’ny « budget » fampandehanan-draharaha mahazatra.

Nitombo ny isan’ny halatr’omby

Momba ny ady amin’ny halatr’omby sy ny asan-jiolahy dia nisongadina tamin’iny herin’andro iny ny fahatratraran’ny mpitandro filaminana basy PA 9 mm sy bala miaraka aminy, nokasaina hamidy tao Fianarantsoa, niaraka tamin’ilay nikasa hivarotra. Nisy koa ny fahatratrarana basy « kalachnikov 01, PATT 01 ary PA MAB 01 miaraka amin’ny bala miisa 87, izay nahasamborana jiolahy 07. Ny resaka halatr’omby kosa dia niakatra raha mitaha tamin’ny herin’andro lasa. 12 ny halatr’omby nisy izay nahaverezana omby 653 ka ny 110 no tafaverina amin’ny tompony. Ny roa tamin’ireo tranga ireo dia tany amin’ny Distrikan’i Befotaka sy Amboasary atsimo izay nanaovan’ny « helicoptère » sidina ka azo ireo omby ary nisy ny dahalo maty 01, naratra 03, azo sambo-belona 01. Tamin’ny toeran-kafa indray dia mpitandro filaminana 01 no naratra tamin’ny fanarahan-dia ; fokonolona 01 ary 01 natao takalon’aina. Ny asan-jiolahy hafa kosa dia nisy 12 manerana ny Nosy ka ny 05 tamin’ireo no teto Andrenivohitra. 03 ny fokonolona maty, 15 naratra. Ny jiolahy kosa dia 01 no maty.
Manantitra hatrany mpitandro filaminana amin’ny fampiasana ny laharana maintso maimaimpoana 119 ho an’ny Zandary ary 017 ho an’ny Polisy mba hahitam-pahombiazana kokoa amin’ny famonjena voina.