Mitaky hatrany ny fampiharana ny tondrozotra

17/04/2013

Tsy marina ny filazana fa nanapa-kevitra ny tsy hiverina an-tanindrazana raha tsy aorian’ny fanatanterahana ny fifidianana ny filoha teo aloha Ravalomanana Marc. Izay no votoatin’ny fanazavana izay nentin’ny mpitarika ny ankolafy Ravalomanana, Mamy Rakotoarivelo. Araka ny tenin’ity filohan’ny Kongresin’ny tetezamita ity dia tsy nanapa-kevitra na hiverina mialoha na aorian’ny fifidianana filoham-pirenena eto Madagasikara ny filoha teo aloha Ravalomanana Marc. Ankoatr’izay dia isan’ny nasongadin’ity mpitarika ny ankolafy Ravalomanana ity ihany koa ny mbola tsy fatanterahan’ny andininy sasantsasany amin’ny tondrozotra ary tsy mitsahatra ny hitaky ny fampiharana an-tsakany sy an-davany izany izy ireo na dia eo azan y fanekeny ny handray anjara amin’ny fifidianana filoham-pirenena. Notsindrian’i Mamy Rakotoarivelo fa ho an’ny ankolafy Ravalomanana dia tsy ny fahatongavan’ity farany mialoha na aorian’ny fifidianana eto an-tanindrazana no zava-dehibe fa ny fampiharana an-tsakany sy an-davany izay nifanekena ao anatin’ny tondrozotra.

Nitondra fanazavana mikasika ny fanoloran’ny ankolafy tarihiny an-dRamatoa Lalao Ravalomanana ho kandidà amin’ny fifidianana filoham-pirenena ihany koa ny filohan’ny Kongresin’ny tetezamita. Nambarany ary fa natolotra ary nanaiky sy tsy nisy nitsipaka ho kandidàn’ny ankolafy Ravalomanana ny vadin’ny filoha teo aloha. Nambarany ihany koa fa mahafeno ny fepetra rehetra takiana amin’ny maha kandidà filoham-pirenena azy ramatoa Lalao Ravalomanana, ary afaka mamerina an’I Madagasikara eo amin’ny toerany eo amin’ny sehatra iraisam-pirenena. Noho izany dia mahatoky izy ireo ha hankatoavin’ny fitsarana manokana momba ny fifidianana n any CES ny filatsahan-ko fidin’I Lalao Ravalomanana.
Omaly no nigadona teto Madagasikara ny delegasiona andiany faharoa avy amin’ny ankolafy Ravalomanana izay nifandinika tatsy Afrika atsimo niaraka tamin’ny filoha teo aloha mikasika ny fiatrehan’izany ankolafy izany ny fifidianana.