Nitsoaka ny orin’asa MainLand?

18/04/2013

Niato efa ho iray volana izao ny fanarenana ny lalam-pirenena faha 5, mampitohy an’I Mahavelona Foulpointe sy Toamasina izay nankinina tamin’ny orin’asa MainLand ny famatsiam-bola azy. 55 Km ny halavan’izany lalana izany kanefa mbola tsy nahavita 10 km akory ny orinasa izay nokaramain’ny MainLand hanao izany asa izany dia izao miala an-daharana sahady izao. Marihina fa novinavinaina ho vita amin’ny volana mai ho avy ion y fanarenana ity làlana ity. mandrahona ny hanao hetsika manoloana izany ny mpitatitra mampiasa izany làlana izany. Nankaiza ny vola am-polony arivo tapitrisa ariary nolazain’ny orinasa MainLand Mining fa navoakany hanamboarana ny lalam-pirenena faha-5? Iza no naka izany vola izany? Aiza ihany koa ilay vola an-jatony tapitrisa ariary avy amin’ny MainLand Mining ihany, saingy nomena ny minisitera ny Asa vaventy mba ahafahany manaraha-maso ny fanamboarana ny lalam-pirenena faha 5 ? Ireo no fanontaniana apetraky ny maro manoloana ny fijanonan’ny asa fanarenana teo amin’ny lalam-pirenena izany efa ho iray volana izao.

Ankoatr’izay dia miandry ny fanatanterahan’ny filohan’ny tetezamita ny teny nomeny ihany koa ny rehetra manoloana izao fihetsiky ny orinasa MainLand izao. Toy izao no nambaran’ny filohan’ny tetezamita fony izy nitokana ny zava-bita tany Toamasina tamin’ny volana febroary lasa teo: “Raha tsy mahavita ny fanamboarana ny lalam-pirenena faha-05 ny MainLand dia ho raisintsika ny fanamboarana azy ary ho roahantsika miala eto io orinasa Sinoa io fa tsy misy mila azy eto isika”.

Tsy voaloha ny volan’ny orinasa

Araka ny loharanom-baovao dia tsy mandeha ny asa fanamboaranana an’io lalam-pirenena io efa ho iray volana izao noho ny tsy mbola nandraisan’ny orin’asa nanankinana ny as any volan’izy ireo sy ny hofan’ny fitaovana vaventy nalain’ny MainLand Mining, taorian’ny fifanolanana teo amin’ity orinasa Sinoa ity sy ny SMATP izay orinasa Sinoa mpanamboatra lalana ihany tamin’ny taon-dasa. Marihina fa tsy mbola tonga ao amin’ny kaomina Antetezambaro izay 10 km avy ao amin’ny nanombohana ny asa ny fanamboarana amin’izao fotoana izao. Roa volana sy tapany anefa no hany sisa alohan’ny hifanaran’ny fifanarahana teo amin’ny MainLand Mining sy ny minisiteran’ny Asa vaventy. Fifanarahana izay natao tamin’ny volana janoary ary mamaritra fa hatrany amin’ny kaominina Mahavelona Foulpointe, izany koe 55km miala an’i Toamasina ny halavan’ny lalana tokony mbola hamboarina.
Tsara ihany koa ny manamarika fa ny andro mialoha ny fitokanana ireo zava-bita tany Toamasina dia naira-nifanome toky tamin’ny tsy maintsy hahavitan’ny RN5 ny minisitry ny Asa vaventy sy ny MainLand Mining. Fanambarana natao tao amin’ny lapan’ny faritra Atsinanana. Ankilan’izay mbola nanome toko tamin’ny fitondrana mpanao gazety nijery ny asa ihany koa ny MainLand Mining ny volana marsa teo. Nambara tamin’izay fa tsy maintsy vita ny asa ary tsy maintsy tratra ny fe-potoana napetraka amin’ny faran’ny volana mai.

Manoloana izany dia fantatra amin’izao fotoana izao fa tezitra ireo mampiasa ny lalam-pirenena faha 5 ary misy tamin’izy ireo ny nilaza fa hitokona sy hanao aakan-dalana raha tsy misy ny famahana haingana ity olana ity.