Neken’ny governemanta ny endrikendriny

18/04/2013

Omaly no nampahafantatra izay mety ho endrikendriky ny vatom-pifidianana tokana ny Vaomiera mahaleotenan’ny fifidianana na ny CENI-T. Araka ny nambara nandritra io fampahafantarana ny Vatom-pifidianana tokana io dia efa neken’ny filankevitry ny governemanta izany endrikendrika izany. Ireto avy ary ny ho hita ao amin’izany vatom-pifidianana tokana izany.

Ny faritra voalohany dia ahitana ny laharan’ny kandidà isan’isany avy. Marihina fa amin’ny alalan’ny antsapaka no hanomezana izany laharan’ny kandidà hifaninana amin’ny fifidianana izany. Eo amin’ny faritra faharoa kosa no hisy anaran’ny antoko sy ny sary famantarana ny antoko na fikambanana manolotra ny kandidà isan’isany avy. Eo amin’ny faritra fahatelo kosa no hisy ny anaran’ilay kandidà. Marihina fa tsy maintsy ny anarana ao amin’ny karam-panondron’ilay kandidà no soratana ao fa tsy ny anarana azony avy amin’ny vadiny. Tsy ho azo ekena arak’izany ny anarana toy ny hoe “Lalao Ravalomanana”. Aoarian’ny faritra misy ny anaran’ny kandidà kosa no hisy ny toerana hanamarihan’ny mpifidy ny safidiny. Mbola tsy mazava loatra kosa ny amin’izay fomba hamenoan’ny mpifidy izany faritra natokana ho azy izany. Hatao amin’ny alalan’ny teboka ve sa amin’ny alalan’ny faribolana kely sa amin’ny alalan’ny tanambokovoko sa lavotondro.
Marihina fa hanana ny laharany (nomerao) isan’isany avy ny vatom-pifidianana tokana mba afahana manara-maso izany. Fantatra ihany koa fa tsy azo ariana ny vatom-pifidianana any amin’ny trano fandatsaham-bato any. Arak’izany rehetra izany dia efa azo atomboka ny fanabeazana ny olom-pirenena amin’ny fampiasana ity vatom-pifidianana ity. Aorian’ny famoahan’ny fitsarana manokana momba ny fifidianana ny anaran’ireo kandidà mahazo milatsaka ho fidina no hivoaka ny vatom-pifidianana tokana hampiasaina amin’ny fifidianana. Aorian’izay ihany koa vao hatao ny fanotana izany vatom-pifidianana izany.