Fanomezan-toky efa tara loatra

18/04/2013

Nanao fanambarana maneho ny fanomezan-tokin’izy ireo manoloana ny fifidianana ireo tomponandrikitra ambony misahana ny fitandroana ny filaminana. Isan’ny toky nomen’izy ireo ny hampiseho tsy fiandaniana politika mandritra ny fifidianana hoa avy, ary handray fepetra mba hanarahan’ireo mpitandro filaminana rehetra an’izany. Raha hatramin’ny 26 janoary 2009 no efa nandray izany fanampahan-kevitra izany ny mpitandro filaminana dia tsy ho tonga amin’izao toerana misy azy amin’izao fotoana izao ny firenena. Antony ilazana fa tsara kanefa efa diso aoriana loatra ny fahatongavan-tsain’ireo tomponandrikitra ambony ao amin’ny tafika sy ny polisy.

Fa taiza izy ireo tamin’ny ora nidona, ka izao vao mahalala fa miankina tanteraka amin’ny tsy fitongilanan’ny mpitandro filaminana ny fahamarinan-toeran’ny safidim-bahoaka? Izay no fanontaniana mipetraka manoloana ny fanambarana izay nataon’ireo tomponandrikitra ambony avy amin’ny polisy sy ny zandary ary ny miaramila eto Madagasikara. Fanambarana izay nentin’izy ireo nampahafantatra teo imason’ny Malagasy manontolo fa « hampiseho tsy fiandaniana politika tanteraka izy ireo mandritra ny fifidianana ho avy, ary handray fepetra ilaina mba hanarahan’ireo mpitandro filaminana rehetra an’izany rehefa manatanteraka ny adidiny izy ireo, na koa any ivelan’ny ora fiasana ». Mazava loatra fa tsy hisy na iray aza hanakiana io fandraisana fanampahan-kevitra nataon’ny mpitondra ambony ao amin’ny tafika sy ny polisy io. Satria izany tokoa no takiana amin’izy ireo, indrindra amin’ny vanim-potoana toy ny fifidianana.
Tsy maty manonta
Ny mahalasa ny sain’ny maro anefa dia nahoana no amin’izao fotoana izao, efa-taona taorian’ny fanonganam-panjakana nitranga teto amin’ny firenena, amin’izao fotoana mialoha ny hanatanterahan’ny FFKM ny dinika fampihavanana izao, ary amin’izao fotoana maha be fanantenana ny maro momba ny fivoahana amin’ny krizy izao. Raha hiverenana tokoa ny tantara dia tsy vitsy ireo fihetsika izay nataon’ny mpitandro filaminana izay nampiseho mibaribary fa manohana olona na tsangan’olona na foto-kevitra izy ireo tamin’ny asa nataony. Ohatra amin’izany ny nitranga tamin’ny 26 janoary 2009 izay nahitana mibaribary fa nisy nitsangana niaro ny fitondram-panjakana sy ny fananam-bahoaka tamin’izany fotoana izany ny mpitandro filaminana. Torak’izany koa ny fihetsika nataon’izy ireo tamin’ilay fivoriana tao amin’ny Episcopat tao Antanimena. Ary farany dia izay nitranga tao Ampahibe tamin’ny fotoana nakan’ny sasany an-keriny ny fahefana teo am-pelatanan’ny mpitantana tamin’izany fotoana izany. Dia iny fanambarana tsotra natao omaly iny ve dia ampy hilazana fa madio eo anatrehan’ny Malagasy ny Tafika sy ny Polisy? Satria raha toy izany ny fomba fanao eto amin’ny firenena dia ho tanteraka ihany ilay fomba fiteny manao hoe “tsy maty manonta”, ka tsy ireo mpanao politika ihany no ho voakasik’izany.
Marihina fa an-koatry ny fanomezan-toky tsy hiandany mandritra ny vanim-potoanan’ny fifidianana dia isan’ny toky nomen’ny mpitandro filaminana nandritra ny fanambarana nataony omaly ny “hirotsaka araka izay azony atao amin’ny fitandroana ny filaminam-bahoaka sy ny fandriam-pahalemana mba ahafahan’ny mpifidy hanatanteraka ny adidiny am-pahatokisana. Etsy an-danin’izany dia miantso ny rehetra ihany koa ireo lehiben’ny mpitandro filaminana mba tsy hisy amin’izy ireo ny hitarika ireto farany hivaona amin’ny adidiny sy ny toatra ara-moraly mifehy azy. Torak’izany koa ny mba tsy hisian’ny sakana amin’ny fanampahan-kevitra rehetra avy amin’ny tomponandrikitry ny fibaikona.