Niantso ny vahoaka hiray hina Ravalomanana

19/04/2013

Nisesisesy tato ho ato ny fidiran’ny filoha teo aloha Ravalomanana Marc tamin’ny alalan’ny antso an-tariby nandritra ireo hetsika famoriam-bahoaka teny an’ivon’ny faritra samihafa. Isan’izany ny nitranga ny alarobia 17 aprily teo tany Antsiranana. Hetsika izay nokarakarain’ny fikambanana VOT (Vondron’olon-tsotra), notarihan’ny filohany Sarah Zoé. Mazava loatra fa nisy ny hafatra nampitan’ny filoha teo aloha tamin’ireo izay nandray anjara tamin’izany hetsika izany. Isan’izany ny antso ho an’ny vahoakan’Antsiranana mba hisian’ny firaisan-kina. Ankoatr’izay dia nankahery ireo mpiara(dàlana aminy ny filoha teo aloha manoloana ny tolona famerenana ny ara-dàlana eto amin’ny firenena. Isan’ny niditra mivantana tamin’ny alalan’ny aantso an-tariby tamin’ity fihaonana ity ihany koa ny mpitondra-tenin’ny filoha teo aloha. Nanantitantitra i Guy Rivo Andrianarisoa fa tokony hiray hina ny rehetra manomboka izao ary hanajanona ny tsy fitovian-kevitra. Nohazavainy tamin’ny antsipirihany ihany koa ny antony nahatonga an’i Lalao Ravalomanana ho kandidà fioloham-pirenena. Inoana hoy izy fa “1er tour” dia vita.

Tafatsangana ny biraon’ny VOT
Tsara ny manamarika fa niompana tamin’ny fanazavana ny antony maharesy lahatra azy ireo amin’ny fanohanana ny filatsahan-ko fidin’i Lalao Ravalomanana ny famelabelaran-kevitra nataon’ny filoha nasionalin’ny VOT, Sarah Zoé tamin’izao diany tany Antsiranana izao. Efa mazava izao, hoy izy, fa Ratoa Lalao Ravalomanana no kandida atolotry ny ankolafy Ravalomanana amin’ny fifidianana filoham-pirenena. Noho izany dia hanao ny ezaka rehetra amin’ny fampandaniana azy ny rehetra, hoy ihany Sarah Zoé. “Fantatsika ny zavabitany tamin’ny fitantanany ny orin’asa Tiko. Tsy mampitovy ny fitantanana orin’asa amin’ny fitantanana firenena, sanatria, fa ny tiakambara dia hoe: efa manana ny fahaiza-mitantana sy traikefa amin’ny fampahombiazana amin’ny zavatra ataony i Lalao Ravalomanana, hoy hatrany ny fanazavan’ity filohan’ny VOT ity tany Antsiranana
Nandritra ity fandalovan’ny filoha nasionalin’ny VOT tany Antsiranana ity ihany koa no nananganana ny rafitr’izany fikambanana izany tany an-toerana.