Nifoha tamin’ny torimasony

19/04/2013

Tsy nahitan-teny ny fikambanana GAR (Groupepent des associations régionales) tao Toamasina hatramin’ny taona 2009 no mankaty. Amin’izao ankatoky ny fifidianana filoham-pirenena sy fifidianana solombavam-bahoaka izao anefa dia manomboka mifoha tamin’ny torimasony indray ity fikambanana ara-politika any Toamasina ity. Izay no tsapa taorian’ny fanambarana fa hanao hetsika goavana ao antampon-tananan’I Toamasina izy ireo amin’ny asabotsy izao. Tsy inona izany hetsika izany fa ny ady hevitra manodidina ny lohahevitra hoe: “fitsinjaram-pahefana tena izy ara-bola sy ara-mpitantanana ny raharaham-panjakana, ny demokrasia ifotony”. Ny profesora Mahafatoky no hanentana ny hiadian-kevitra izay natao indrindra ny handraisana ny soson-kevitry ny mpandray anjara. Ho an’i Mahavimbina Alain filoha mpanorina ny fikambanana “GAR” izay niorina tamin’ny volana febroary 2008 dia “noraisina manokana io loha-hevitra io, satria efa ela no nilazan’ireo mpitondra nifandimby ny fampiharana azy io, nefa hatramin’izao dia tsy mbola nitondra tena fampandrosoana marina ny firenena sy ny isam-paritra izany ary nahatonga fitakiana maro”.

Noho izany, hoy hatrany Mahavimbina Alain dia “misy lesoka tokony harenina sy hatsaraina ny fomba fampiharana izany fitsinjaram-pahefana tena izy izany, ka izay no hilana ny dinika hifanaovana mba harafitra ho tahirin-kevitra izay tafiditra rahateo amin’ny demokrasia ifotony tianay hapetraka eto amin’ny firenena”.

Nohararaotin’i Mahavimbina Alain ihany koa ny fihaonana tamin’ny mpanao gazety nanazavana ny saim-bahoaka manodidina ny resaka mandeha ny amin’ny mety ho filatsahany ho fidina. Nambarany fa “tsy mbola fotoany izao, tsy izaho koa no manapaka izany fa ny mpikamban’ny GAR rehetra. Tsy voatery ho anaty fitondrana na ny filatsahan-kofidiana ihany koa ny fandraisana andraikitra ho fanasoavam-pirenena”. Ankoatra izay dia isan’ny nampisy resaka ny fisiana sary na “TGV” amin’ny sary famantarana ny “GAR”. Nomarihan’ny filoha mpanorina ny fikambanana GAR fa fomba entin’ny fikambanana milaza ny asa tiany hatao mba ho tena haingam-pandeha no anton’izany. Na izany, tsara ho fantatry ny olona fa ny GAR no sahy namaky sehatra ny fanapariahana ny foto-kevitry ny fikambanana Tgv tao Analamanga taorian’ny naha-ben’ny tanana an’i Rajoelina nanangana izany; izany no mahatonga anay tsy mialon-jafy fa nanangana ny vondrona ity mba hahafahan’ny fikambanana maro sy ny antoko politika mitovy hevitra miara-mirona amin’ny fampandrosoana”.