“Olan’ny Mainland sy ireo teknisiana ny fihantonan’ny RN5”

20/04/2013

Nivoaka tamin’ny fahanginany ny lehiben’ny faritra atsinanana, Alain Mahavimbina, mikasika ny olana amin’ny fijanonan’ny asa fanamboarana ny lalam-pirenena faha-05. Nambaran’Atoa Alain Mahavimbina fa “tafiditra amin’ny fandaharan’asan’Ambohitsirohitra ny fanamboarana ny lalam-pirenena faha-05, izay no nahatonga ny filohan’ny tetezamita mihitsy no nanokatra ny fanamboarana azy ny taona lasa. Tsy nisy anefa izany noho ny olana teo amin’ny MainLand mpamoaka ny vola araka ny bokin’andraikitra nifanekeny tamin’ny fanjakana Malagasy amin’ny fanamboarana ny simba ara-tontolo iainana, sy ny orinasa Smatp nahazo ny tolo-bidy nataon’ny MainLand ihany.

Niverina anefa ny fanamboarana ny volana febroary teo araka ny teknisiana sy ny orinasa nifanarahan’ny MainLand ihany, fa tsy nidiran’ny fanjakana Malagasy. Misy anefa ny olana izay fa niato ny asa ka tsy nitaza-potsiny ny faritra atsinanana, fa niezaka ny namaha ny olana amin’izay andraikiny amin’ny maha- eo anivon’ny faritra ny lalam-pirenena faha-05 hamboarina”. Nomarihan’Atoa Alain Mahavimbina hatrany fa “tombontsoam-pirenena sy filan’ny vahoaka amin’ny fiainany an-davanandro io ny lalam-pirenena faha-05 iny, ka tokony hisy ny ady hevitra sy fifanadaminana ary ny fifampiresahana mikasika ny fiverenana amin’ny fanamboarana azy indray”. “Ny zava-misy mantsy dia olana eo amin’ny MainLand, teknisiana nalainy, ny orinasa mpanamboatra ny lalana nofidiany, ary ny teknisian’ny minisiteran’ny asa vaventy mpanara-maso ny asa avy amin’ny fanjakana, ka izay no mila vahana haingana mba tsy ho olana amin’ny mpampiasa ny lalana sy ny ho avin’ny fizahan-tany ao Mahavelona Foulpointe ny raharaha”, hoy hatrany ny lehiben’ny faritra atsinanana namarana ny fanazavany mikasika ny olan’ny RN5 niato; ireo mpitatitra sy ireo mpandraharara rahateo araka ny angom-baovao milaza ny hanao fitokonana tsy ho ela.