Mitaky fametrahana rafitra vaovao

22/04/2013

Ny fampiharana ara-bakiteny ny fitsinjaram-pahefana no hitan’ny mpandray anjara tamin’ny ady hevitra ara-politika nokarakarain’ny fikambanana GAR (Groupement des Associations Regionales), fa lala-tokana afahana mampandroso araka ny tokony ho izy an’i Madagasikara. Niaiky ihany koa ny mpandray anjara fa mila ovana ny rafim-pitantanana sy ny rafim-pitondrana eto amintsika raha tiana ny hanarina ny firenena. Marihina fa niafara tamin’ny fifandonana teo amin’izy samy izy ka nandratrana olona ny hetsika nifanindran-dàlana tamin’ity ady hevitra nokarakarain’ny GAR ity Mpizaika tsy latsaky ny 300 avy amin’ny faritra atsinanana no nandray anjara tamin’ny ady hevitra ara-politika, nokarakarain’ny fikambanana politika GAR “Groupement des Associations Regionales. Tao amin’ny efitrano malalaky lycee Stella Maris no nanatanterahana izany tamin’ny asabotsy teo. “Ny fitsinjaram-pahefana tena izy: ara-bola sy ara-pitantanan-draharaha ara-panjakana, demokrasia ifotony”. Io kosa no loha-hevitra niandian-niompanan’izany ady hevitra izany izay nahitana ny fandraisan’anjaran‘ny profesora Rasolofo Rene, mpikambana ao amin’ny filankevitra avon’ny tetezamita.

Niarahan’ireo mpandray anjara maro nanaiky fa tena ilaina amin’ny fampivoharana sy fampandrosoana an’i Madagasikara ny fampiharana ara-bakiteny ny voasoratra momba ny fitsinjaram-pahefana eto amintsika. Niara-niaky ihany koa ny mpizaika fa mila ovana ny rafi-pitantanana sy ny rafi-pitondrana eto amintsika, noho izy ireo lasa sakana amin‘ny fampiharana ny fanapariaham-pahefana tena izy hatramin’izany. “Marefo ny tokantranom-pirenentsika amin‘izao fotoana izao, vokatry ny krizy politika sy ny nataontsika ihany. Mila olona vonona tanteraka ny hanarina izany ny firenena”, hoy i Rasolofo Rene nandritra ny fanazavany. Izay ihany koa no namafisin’ny filohan’ny ny GAR, Mahavimbina Alain tamin’ny filazana fa “ny ‘trafic d’influance’ mihintsy no sakana teto amintsika amin’ny fampiharana ny tena fanapariaham-pahefana”. Ho an’i Rasolofo Rene anefa, raha hampiharina izany fitsinjaram-pahefana izany, dia mila “fahaiza-manao, fifampitokisana, fanaraha-maso ara-dalàna, ary fahasihina marina…teny ifampiherana izay antoky ny demokrasia ifotony, fanajana ny lalana misy, no entina hanatontosana izany”. Teo anatrehan’izany rehetra izany, na tsy niteny mivantana aza ny mpandray anjara tamin’ity ady hevitra ity, dia niaiky izy ireo fa ilaina ny fametrahana ny rafitra vaovao fandaminam-pitondrana eto amin’ny firenena alohan’ny hirosoana amin‘ny fifidianana.

Niafara tamin’ny bagara

Ankoatra ny ady hevitra nanao ny lanonana fifampiharahaban’izy ireo noho ny taom-baovao teny amin’ny “foyer social” Canada ihany koa ny tolakandron’ny sabotsy teo ny fikambanana politika GAR. Niteraka korontana anefa izany ka naharatrana mpikambana noho ny sakoroka vokatry ny fandaminan’ireo fikambanana nikarakara izany, izay nahatezitra mafy ny filoham-boninahitry ny GAR. Tonga niatrika ny hetsiky ny GAR ihany koa ireo tompon’andraikitra isany Ndahimananjara Johannita avy amin’ny antoko AVI, Irma Naharimamy avy amin’ny antoko TGV, Benessy Harison avy amin’ny FIMAMI, ny Profesora Ratsivalaka, ary ny Ray aman-dreny Lahady Samuel avy amin’ny antoko AREMA.