Tratra i “Dog” sy i Belaza

22/04/2013

Jiolahy nampihorohoro tamin’ny asa-ratsiny tao antampon-tananan’i Toamasina i Randrinantenaina Gotier Francis na “Dog” monina ao Ankirihiry avaratra, sy i Bilaza Elysee na Nesta Bemenaka monina ao Andranomadio. Nifarana hatreo anefa ny asa-ratsin’izy ireo satria voasambotra nandritra ny hetsika manokana nataon’ny polisin’ny komisaria Toamasina I izy ireo tamin’ny faran’ny herinandro teo. Nalaza ratsy tamin’ny fanendahana, vaky trano, fanolanana vehivavy tratra hariva amin’ny posy, ary fangalarana scooter teny amin’ny bazary kely sy “gare routiere” ary amoron-dranomasina iry voalohany. Efa feno takom-pery sy holatra ny vatany noho ny vono mahazo azy nefa hatramin’izao dia tsy mety maty tamin’ireo fitsaram-bahoaka nahazo azy. Efa betsaka koa ny fitarainan’ny olona mikasika azy fa vitsy ny tena sahy mijoro mitory, izay nanasarotra ny fanaovan’ny polisy ny asany ary naha afaka azy hatrany nandritra ny taona maro nahasamborana azy.

I Belaza Elysee na Nesta Bemenaka kosa, dia ny fividianana cyclo-pousse halatra no tena hahafantarana azy. Efa manana ekipa mangalatra izany fotsiny ny tenany, ka ireo ekipany ireo no maka ny posy any amin’ny tompony amin’ny filazana fa hiasa ho jockey. Ireto iraka ataony ireto ihany avy eo no mitaraina amin’ny tompon’ny posy amin’ny filazana ny fahaverezany, ka ho an’ny polisy dia am-polony isan’andro tato ho ato ny filazana sy fitarainana ary fitoriana posy very voarain’ny polisy. Tapatapahan’ingahy Nesta Bemenaka ireo posy azony izay vidiny 40.000 ka hatramin’ny 50.000 ariary. Avy eo dia averiny atambatra sy lokoina vaovao ary amidiny 160.000 ka hatramin’ny 200.000 ariary indray arakaraka ny hatsarany sy ny hendriny. Tamin’ny fisamborana azy, dia mbola nahatrarana posy tapatapaka miisa 20 tao an-tokontaniny.
Ny sabotsy teo nohenoina teny amin’ny fitsarana ny raharahan’izy mirahalahy ireo, ka araka ny vaovao farany dia miandry fitsarana am-ponja i “Dog” sy “Nesta Bemenaka”