Tsy voaaja ny fahalalahana, hoy ny Amerikanina

23/04/2013

Iray amin’ireo teboka maro izay nasongadin’ny tatitra momba ny tsy fanajana ny zon’olombelona eto Madagasikara ny momba ny tsy fisian’ny falalahan’ny asa fanaovan-gazety ary ny tsy fisian’ny fahafaha-maneho hevitra eto Madagasikara. Nambaran’ity tatitra navoakan’ny masoivoho amerikanina eto Madagasikara ity fa “nanohy nanakana hatrany ny fampiharana ny fahalalahan’ny fanehoan-kevitra sy ny fahalalahan’ny mpampahalala vaovao ireo mihazona ny fahefana sy ny manam-boninahitra sasany”. Ny fandrahonana sy ny fampidirana am-ponja no nambaran’ilay tatitra navoakan’ny masoivoho amerikanina eto Madagasikara fa fitaovana nentin’ny fitondrana amin’izao fotoana izao nanitsakitsaka ny falalahana amin’ny fanehoan-kevitra eto amintsika. Nambaran’ny fanambarana fa “na dia iantohan'ny lalàna aza ny fahalalahana maneho hevitra, dia niharan’ny faneriterena ny fahafahan’ny olon-tsotra nitsikera ny fitondrana, na ampahibemaso izany na tsia, raha ny zava-nisy andavanandro no jerena. Nofehifehezin’ny manam-pahefana mafy ny fahalalahan’ny fanehoan-kevitra, ka tamin’ny alàlan’ny fandrahonana ny mpanohitra sy fampidirana am-ponja na fampiharana herisetra rehefa tsy nampihontsona ny mpitsikera ny fandrahonana no nanaovany izany.

Nokendren’ny mitàna ny toeran’ny minisitry ny serasera manokana ireo maneho tsy fitovian-kevitra amin’ny fitondrana, ka nomeny taratasy fampitandremana ireo mpampahalala vaovao naneho fanadihadiana tsy nahafaly ny fitondrana. Tamin’ny volana Septambra dia naato ny tonian’ny fahitalavi-panjakana, voalaza fa ny namelany mpanao politika mpanohitra haneho hevitra tao no antony”.

Fangejana asa fanaovan-gazety:
Nokianin’ny fanambarana mafy dia mafy ihany koa ny fangejana ny asa fanaovan-gazety izay nahazo vahana teto amintsika tao anatin’izao fitondrana izao. Hoy indrindra izany fanambarana izany : “Na dia iantohan'ny lalàm-panorenana aza ny fahalalahan’ny asa fanaovan-gazety, dia voafetra be ny fahafahan’ny mpampahalala vaovao mitsikera ny fitondrana. Marihina manokana ny tsy fisian’ny fehezan-dalàna momba ny serasera, natao hiaro ny fahalalahan’ny asa fanaovan-gazety, ka nahafahan’ny manam-pahefana mitory mpanao gazety araka ny lalàna momba ny fanalam-baraka sy ny Fehezan-dalàna momba ny ady heloka bevava, isaky ny manohintohina an’ireo mihazona ny fitondrana ny vontoatin’ny karo-baovao nampitainy. Maro ny olon-tsotra nitatitra fa na ireo mihazona ny fahefana na ireo mpanohana azy dia samy nisakana tamin’ny fomba rehetra ny tsikera politika, tamin’ny alàlan’ny fandrahonana sy herisetra nampiharina tamin’ireo olon-tsotra sy vondrona mpanohitra. Tamin’ny volana Novambra ilay mitàna ny toeran’ny minisitry ny serasera no nilaza ampahibemaso fa izay fanambarana rehetra manohintohina ny “tombontsoan’ny besinimaro” dia tsy azo ampitaina amin’ny fampitam-baovaom-pirenena. Ny fanambarana nataon’ireo manam-pahefana eo an-toerana toy izany no tena nisakana ny fampahalalam-baovaom-pirenena tsy hampita ny vaovao mikasika ny olon-tsotra na vondrona mpanohitra. Natsahatry ny manam-pahefana tamin’ny asany koa ireo mpanao gazety nanohy nampita vaovao na dia efa nomen’ny fitondrana fampitandremana aza…”

Nitanisa ohatra maromaro mapiseho mibaribary izany fandrahonana ny mpanao gazety izany ny tatitry ny fanjakana amerikanina. Santionany amin’izany no tsiahivintsika eto: “Ny Vaomiera manokana ho an’ny serasera amin’ny alàlan’ny haino aman-jery (CSCA), tarihin’Atoa Harry Laurent Rahajason, izay mitàna ny toeran’ny minisitry ny serasera, dia nandefa taratasy fampitandremana tany amin’ny onjam-peo maro nandritra ny taona, nibaiko azy ireo hampitsahatra ny fandaharana heverina fa manohitra ny fitondrana, no sady nandrahona ny hampiatoana ny alàlana ananany hampiasa onjam-peo sy hampidirana am-ponja ny mpanao gazety ao aminy. Ohatra iray amin'izany, tamin’ny 07 Jona ny Ministeran’ny Serasera dia nandefa taratasy fampitandremana tany amin’ny Radio Feon’I Toamasina, izay nampangainy ho nanaparitaka vaovao manakorontana ny filaminam-bahoaka. Nandefasana taratasy toy izany koa ny Radio Taratra tamin’ny volana May, niampanga azy ho niasa tsy nahazo alàlana, na dia efa nahazo alàlana mazava aza io onjam-peo io tamin’ny taona 2010. Tamin’ny volana May ny biraon’ny Radio Mada, fananan’ny filoha lasa sesi-tany, dia nanaovan’ny manam-pahefana bemidina. Voalaza ho nandrahona ny mpanao gazety koa ireo miaramila. Nisy ohatra ny taratasy fampitandremana mpanao gazety navoakan’ny birao misahana ny serasera ao amin’ny tafika, “tsy handoto ny voninahitry ny tafika na ny hasin’ny olom-pirenena.”

Tsar any manamarika fa isan’ny nokianin’ity fanambarana ity ihany koa ny fisian’ny fitongilanana eo amin’ny fanomezana fahafaha-manokatra haino aman-kery eto Madagasikara. “Ny vondrona mpampahalala vaovaon’Atoa Andry Rajoelina, mpitarika ireo mihazona ny fahefana, izay misoratra amin’ny anaran’ny rainy, dia nomena alàlana hanitatra ny faritra iasany ho tonga hatrany amin’ny faritany”, araka ny voalaza ao amin’izany tatitra izany.