Entana halatra narovan’ny polisy

23/04/2013

Halatra sy fandrobana an-karihary. Tsy iray fa maro, satria ireo rehetra izay nolalovan’ireo korontam-by sy fitaovana samihafa nentina tamin’ny fiarabe sy posy maromaro nihazo an’Ambalabe eo Toamasina dia samy nahita izany avokoa. Tsy inona izany fa ireo korontam-by sy entana samihafa avy ao amin’ny orinasa TIKO ao Toamasina, ahitana ny Magro Morafeno sy Tanambao V, ny TOP II sy ny MANA eny amin’ny seranan-tsambo, ny “Agence Tiko” boulevard Augagneur teo aloha, ary ny tranom-barotra Roso teo aloha ao Ampasimazava. Fiarabe sy posy maromaro no nitondra ireo entana ireo ho any Ambalabe tamin’ny faran’ny herinandro teo. Ary ny nahagaga dia mpitandro filaminana avy amin’ny polisim-pirenena mihintsy no niaro ireo mpitondra izany entana izany sy nanamora ny dian’izy ireo manoloana ireo mpitandro filaminana hafa sendra azy ireo. Izany ihany koa angamba no nentina nanakonana ny mason’ny mpijery ka nilazana fa ara-dàlana avokoa ireo entana ireo.

Ao anatin’izay rehetra izay, tsy misy afa-miteny noho ireto mpangalatra tsara mpiaro sy manana fiarovana mafy ny tao Toamasina. Ny talem-paritry ny Varotra natao hiaro ny fananan’ny TIKO araka ny efa notapahan’izy ireo hatramin’ny taona 2009 dia nitazam-potsiny ihany koa ary tsy miteny sady tsy mitory nahita izao raharaha izao. Ireo mahita sy malahelo ary sorena mijery ny zava-misy koa tetsy an-danin’izany, dia samy tsy afa-nihetsika noho ny tahotra ny valifaty sy antsonjay mety hanjo azy ireo avy amin’ireto “jiolahin’Ambalambe” tsy misy tahotra sy henatra noho ny fiarovana “manaram-penitra” azony ireto. Ankoatra izay, dia fahasimbana goavana no mahazo ny orinasan’ny fianakavian’dRavalomanana ao Toamasina; ka miandry izay “operation” jiolahy ataon’ny mpitandro ny filaminana ny rehetra amin’ny zava-misy…
Tsara ny manamarika fa tsy misy tsy hita ao Ambalabe ao ankehitriny raha mbola korontana sy ireo fitaovana samy hafa, ka ny ankamaroany dia azo avy amin’ny “bizina maloto” sy “halatra” ary “fanimbana fananan’olona” avokoa. Isan’ny lasibatra amin’izany halatra sy fanimbana fananan’olona izany ny fananan’ny orinasa TIKO ao Toamasina,