Voafira famaky sady voatifitra ilay raim-pianankaviana

23/04/2013

Nisy fanafihan-jiolahy mitam-piadiana niseho tao amin’ny Fokontany Ampivarotanomby, kaomina ambanivohitra Mahazoarivo, distrikan’i Fandriana, Faritra Amoron’i Mania, ny 21 aprily 2013 tamin’ny 02 ora sy sasany maraina. Jiolahy folo eo ho eo mitondra basy sy fitaovam-piadiana hafa no nanao ny fanafihana mpivarotra iray 56 taona. Niezaka nanohitra ihany ity raim-pianakaviana ity saingy tratran’ny be noho ny vitsy ka maty noho ny ratra nahazo azy.

Famonoana feno habibiana no nihatra tamin’ity raim-pianakaviana ity toy ny fira famaky tamin’ny lohany ; tomboka benitra tamin’ny lamosiny ary tifitra tamin’ny tanany. Nohon’ny antso vonjy tamin’ny mpitandro filaminana nataon’ny Ben’ny tanàna dia nirotsaka teny an-toerana avy hatrany ny zandary avy ao amin’ny « compagnie » Ambositra saingy efa tafaporitsaka tamin’ny moto ireo olon-dratsy.

Raikitra ny fikarohana ireto olon-dratsy ireto teny amin’ny lalana izay neritreretina fa handalovan’izy ireo ka napetraka ny « barrage ». Ny Alahady 21 Aprily 2013 tokony ho tamin’ny 10 ora maraina raha natao ny fisavana fiara « Renault express » iray mampitohy an’Imady sy Ambositra dia tratra tao ny 05 tamin’ireo olon-dratsy, saingy tafatsoaka avy hatrany ny telo raha vao nahita ireo zandary. Rehefa nosavana ny roalahy tratra dia nahitana fitafiana mihosin-dra miampy basy PA vita gasy roa (02) sy basim-borona (FC cal 12) iray (01) sy bala vitsivitsy ary fitaovam-piadiana maro samihafa.

Ankoatra ny aina nafoy dia vola mitentina 1.720.000 Ariary no voaroba. Tratra tamin’ireto roalahy izay marihina fa avy aty Antananarivo, nandritra ny fisavana ny anjara volan’izy ireo tamin’ny fanafihana. Eo an-dalam-pikarohana ireo jiolahy mbola tsy hita ny eo anivon’ny vondron-tobim-paritry ny zandarimaria ao Ambositra ary ireto tratra ireto kosa dia hatolotra ny fampanoavana aorian’ny famotorana. Angatahana noho izany fanomezam-baovao avy amin’ny fokonolona hahafahana misambotra azy ireo