Ny FFKM irery no eken’ny rehetra

24/04/2013

Teboka telo no azo ambara fa lehibe indrindra tamin’ireo nanamarika ity tetezamita lalovan’ny firenena ity. Tsy inona izany fa ny fifidianana sy ny fifanarahana politika ary ny fandraisan’andrikitra. Raha hiresaka ny teboka voalohany isika dia milaza miara-mahita ny rehetra fa tsy nakatoavin’ny be sy ny maro ny fifidianana fitsapankevi-bahoaka izay natao teto amin’ny firenena, na dia iaraha-mahalala aza fa vahoaka ihany koa no nifidy an’izany lalam-panorenana izany. Torak’izany ihany koa ny momba ny fifanarahana politika izay noheverina fa hitondra an’i Madagasikara hiala amin’izao krizy lalovan’ny firenena izao. Tsy inona izany fa ny Tondrozotra izay iaraha-mahalala ihany koa fa mahazo kiana mafy dia mafy amin’izao fotoana izao. Tsy isalasalana rahateo ny milaza fa tsy mahasolo ny vahoaka Malagasy tsy vakivolo ireo vondrona sy antoko politika miisa 11 izay nanao Sonia an’izany tondrozotra izany. Antony mampitombina ny fanankianana izay manandrify azy amin’izao fotoana izao. Antony ihany koa mahatonga ny tsy fahombiazan’ny fampiharana azy araka ny tokony ho izy.

Ny teboka fahatelo nanamarika an’ity tetezamita ity dia ny fandraisan’andraikitra izay ataon’ny FFKM amin’ny alalan’ny dinika fampihavanana izay efa nialohavana fihainoana an’ireo antoko sy vondrona maherin’ny 180 ary mbola hakana ny hevitr’ireo faritany FFKM 35 manerana ny Nosy. Raha hiresaka ny FFKM isika dia lasa any amin’ireo filoham-piangonana efatra izay mitaroka izany rafitra izany ny eritreritra. Tsy iza ireo fa ny Mpitandrina Lala Rasendrahasina, ny eveka Razanakolona Odon, ny eveka Samoela Jaona Ranarivelo, ary ny mpitandrina Rakoto Endore Modeste. Hatreto dia tsy mbola nisy taminireo fiangonana izay tarihan’izy efa-dahy ireo no nanao fanambarana ka nilaza fa tsy misolo tena azy ireo izy ireo. Tsy mbola nisy ihany koa na dia rafitra faran’izany lehibe ao an’ivon’ireo fiangonana ireo aza, ka nilaza fa tsy avy amin’ny fiangonana misy azy avy ireo mpitondra fiangonana mivondrona ao amin’ny FFKM ireo. Tsara anefa ny manamarika fa ny 70% n’ny Malagasy dia kristianina avokoa. Izany hoe mahasolotena ny 70% n’ny vahoaka Malagasy ny FFKM. Antony ilazana fa ny FFKM irery ihany no eken’ny rehetra rah any lalan-kivoahana amin’ny krizy no resahina.



Mompera Alain Raharison
« Tsy hanova rafim-panjakana ny FFKM »
Nitondra ny heviny manoloana ireo fanankianana samihafa, indrindra ny fanankianana an-gazety miantefa amin’ny FFKM manoloana ilay dinika fampihavanana izay nokarakarain’ity farany, ny sekretera jeneralin’ny fikambanana Fahamarinana sy Fiadanana (Justice et paix), Mompera Alain Thierry Raharison. Araka ny fanazavany dia tsy tokony hanova n’inon’inona amin’ny dingana efa natao hatramin’izao ny ezaka fampihavanana ataon’ny FFKM amin’ny maha mpaminany an’ity farany. Nambarany ihany koa fa tokony ho mailo manoloana ny soson-kevitra mety hamingana amin’ny toe-draharaha toy ireny ny isan’isany avy.
Nokianin’ny sekretera jeneralin’ny fikambanana Fahamarinana sy Fiadanana, izay rafitra iray eo anivon’ny Fiangonana Katolika ny fomba fijery mampifanandrify ny fitondram-panjakana amin’ny FFKM (Fiombonan’ny fiangonana Kristianina eto Madagasikara) taorian’ilay dinika fampihavanana izay natombok’ity farany. “Diso ny mampifanandrianana ny FFKM sy ny fitondram-panjakana. Kajikajy politika no ao ambadik’ireny”, hoy indrindra ny fanazavan’i Mompera Alain Thierry Raharison tamin’ny fanazavany tamin’ny alalan’ny onjam-peo. Nambarany fa famaliana sy fanatanterahana ny antson’ny Tompo, izay efa niantsoroany hatrizay no nataon’ny FFKM. Tsy inona izany fa ny fiantsoana ny olona hibebaka sy hiova fo.
Kajikajy politika
Etsy an-danin’izany nambaran’ity mpitondra fivavahana avy amin’ny fiangonana Katolika ity fa tsy voatery hanova ny dingana efa ataon’ny fanjakana ny FFKM raha nanatanteraka ny dinika fampihavanana izay nian tsoany ny rehetra tamin’ny herinandro lasa teo. Mety hisy, hoy izy ny nanoso-kevitra nandritra izany dinika izany. Saingy tsy maintsy mitandrina ny rehetra satria mety hisy ihany koa ny soso-kevitra mamingana.
Nambaran’ny sekretera jeneralin’ny “Justice et paix” ihany koa fa tsy sakana ho an’ny fifidianana velively ny fibebahana izay entin’ny FFKM tamin’ny alalan’ny dinika fampihavanana. Manatsara dingana atrehina amin’ny fifidianana azan y fibebahana sy fiovam-po ateraky ny fampihavanana rah any fanazavany ihany.
Mikasika ny resaka mandeha amin’ny hoe tetezamita vaovao dia nambaran’i Mompera Alain Thierry Raharison fa ny mpandray anjara tamin’ity dinika teny Ivato ity no nitondra izany soso-kevitra izany fa tsy ny FFKM velively. Nambarany fa tsy miditra amin’ny resaka fanovana rafitra na oviana na oviana ny FFKM. Nokianin’i Mompera Alain Thierry Raharison mafy arak’izany ny lahatsoratra an-gazety izay mampifanandrina ny FFKM sy ny fitondram-panjakana. Araka ny fanazavany dia misy kajikajy politika ao ambadik’ireny lahatsoratra ireny.