Hanaovana velirano ny fanekena ny valiny ?

24/04/2013

Asa na ho firy na ho firy no mety ho isan’ny kandidà hilatsaka ho filohampirenena amin’ity taona ity. Ny hany tsy azo lavina dia hioatra ny 20 isa izy ireo. Ary samy manantena ny ho lany. Eo indrindra no tokony hisian’ny fifanarahana mialoha, mba tsy hisian’ny fanoherana sy tsy fanekena rehefa mivoaka ny valim-pifidianana.

Matoa tokoa ny mpifaninana iray milatsaka ho fidiana dia mahatsapa izy fa mandeha araka ny heveriny fa tokony ho izy ny fanomanana, ny fanatanterahana, ary ny fizotry ny fomba fanisam-bato rehefa vita ny fifidianana. Tokony tsy hisy intsony araka izany ny fimenomenomana sy fanoherana. Mora tenenina anefa izany fa sarotra tanterahina ihany satria, vola be no lanin’ireo kandidà nandritra ny fampielezan-kevitra.
Eo indrindra no tokony hisy ny karazana velirano hataon’ny tsirairay, mba ho valim-pifidianana eken’ny rehetra no hivoaka eo. Mety hisy ny fitarainana vokatry ny fahitan’ny kandidà tsirairay, tsy fihetezan-jàvatra nandritra ny fifidianana. Zony tanteraka ny mametraka fitarainana any amin’ny “CES” araka izany. Dia eo no hamoahan’ ity fitsaràna ny raharaham-pifidianana ity didy mikasika ireo fitarainana ireo. Ka rehefa mivoaka ny valim-pifidianana farany dia tokony ho eken’ny tsirairay.
Izay ihany no tena fomba hanehoana ny tena demokrasia amin’ny firenena iray. Toy izay miseho any amin’ny firenena efa mandroso rehetra any Europe sy Amérique.
Raha tsy izany isika mianakavy dia hifotetaka amin’ny krizy sy ny fahantrana eto mandrakariva. Fifandimbiàsana ny fitondrana firenena, ka rehefa eo ianao, ataovy izay ahasoa ny vahoaka fa tsy ho adinony ianao amin’ny fifidianana manaraka. Raha mpanohitra ianao, aoka ny tsikeranao, sady mety hanitsian’ny eo amin’ny fitondrana ny diany, no hambabo ny vahoaka, ka ahatonga azy indray hifidy anao amin’ny manàraka. Satria tokoa mantsy ny fanaovana politika, fiandrandràna fitondram-panjakana.