“Mila fifidianana hamahana ny krizy”

24/04/2013

Mbola mitana ny hevitry ny maro, indrindra ny mpanao politika sy ny vondrona politika ny fihaonana nataon’ny FFKM, izay namoaka araka ny hevitry ny mpivory ny hananganana “tetezamita bis” eto amin’ny firenena. Mirona mankany avokoa ny hevitry ny mpanao politika sy ny vondrona politika izao, ka ho an’Atoa Alain Mahavimbina lehiben’ny faritra atsinanana sy filoham-boninahitry ny fikambanana politika GAR na “Groupement des Associations Regionales”, dia tsotra ny nambarany fa “amiko dia mbola dinika soson-kevitra no nataon’ny FFKM iny, mbola haka ny hevitry ny maro isam-paritra izy ireo alohan’ny hamoahan’izy ireo ny hevitra farany.

Ilaina ny fiandrasana izay hevitra farany fa sao hitsara ambolony sy tsy am-pandinihana isika ka hanova ny tena hevitry ny maro an’isa. Na izany mila fifidianana ny vahoaka Malagasy, nefa fifidianana madio sy fifidianana mangaraharaha ary fifidianana eken’ny rehetra no tadiaviny amin’izany. Tsy misy mantsy ny vahaolan’izao krizy izao raha tsy ny safidin’ny Malagasy maneho ny heviny ihany”. Ho an’ny filohan’ny fikambanana politika GAR anefa dia fotoana izao fidirantsika amin’ny fifidianana izao, ny mametraka ny hevitrantsika mikasika ny rafi-pandaminana tsara hitantanana ny firenena sy hitondrana ny fampandrosoana isam-paritra, ka tsy misy afa-tsy ny fitsinjaram-pahefana tena izy sy ny demokrasia ifotony ihany izany araka ny nambarany fa “hatramin’ny taona 80 nanoratana izany tao anatin’ny lalam-panorenenana, ny taona 90 tamin’ny famerenana ny rafitry ny kaominina teto amintsika, ary ny taona 2002 tamin’ny fametrahana ny faritry ho fanatsarana hatrany ny fitsinjaram-pahefana, dia eo amin’ny fampiharana azy no mbola misy olana sy mbola misy tokony harenina. Izay no nahatonga ny fitondran-dRvalomanana ny taona 2005 nametraka ny drafi-pandaminana nantsoina hoe “LPDD” nentina nanatsara ny fiaraha-miasa sy fifandrasaina matotra teo amin’ny fitsinjaram-pahefana sy ny fanampariaham-pahefana. Tsy midika izany fa ratsy ny foto-kevitra federalisma, fa raha mbola misy tsy mety izany raha mbola toy izao ny sehatra politika eto sy ny traikefantsika amin’ny fitantanan-draharaham-panjakana”. Ankilan’izay, dia namaly ny fanakianana azy ihany koa Atoa Alain Mahavimbina amin’ny fitantanana ny faritra atsinanana sy ny fahazoany ny fananany manokana, ka nanamarihany fa “tsoriko fa talohan’ny naha-lehiben’ny faritra ahy dia efa mpandraharaha ny tenako ary nanao io asa io hatrany na efa lehiben’ny aza tao anatin’ny efa-taona. Raha mikasika ny fitantanana ny volan’ny faritra kosa, dia manana kaonty manokana eo anivon’ny tresor ny Toamasina ny faritra; tsy mivoaka ho azy ireo vola ireo fa tsy manaraka ny famoaham-bolam-panjakana; marihako koa fa misy hatrany ny fanaraha-maso izay ataon’ny fanjakana foibe”. Nohazavainy koa fa “misy ny fotoana ahanginana, misy ny fotoana tsy maintsy itenenana; tsoriko fa ampy hitsaran’olona ahy ihany koa ny efa-taona naha-lehiben’ny faritra ahy ka tsy matahotra ny fitsaram-bahoaka aho, nefa mbola tsy fotoana hilazako ny fanohanana olona na filatsahan-kofidiako izao, fa misy fotoanany daholo ny zavatra rehetra. Tsara ho fantatry ny vahoaka Malagasy koa fa ho an’ny faritra atsinanana izay kapitaly ara-toe-karena dia tsy misy afa-tsy 2,1% monja ny fampiasam-bola azony tamin’ny minisiteran’ny fanampariaham-pahefana ny taona 2010”. Ankoatra izay, raha jerena io fitsinjarana mitanila ny fampiasam-bola nomen’ny minisiteran’ny fanampariaham-pahefana ho an’ny faritra 22 ny taona 2010 io, dia Analamanga 42%; Matsihatra ambony 3,4%; Aloatra-Mangoro 6,1%; Atsinanana 2,1%; Diana 3,1%; Sava 2,6%; Boeny 2,3%; Melaky 1,3%; Atsimo atsinanana 3,2%; Anosy 4,5%; Androy 0,8%; Atsimo Andrefana 2,3%; Manabe 2,0%; Sofia 2,1%; Ihorombe 2,3%; Betsiboka 3,1%; Itasy 1,9%; Bongolava 4,4%; Vakinakaratra 5,7%; Amorin’i Mania 6,2%; Analanjorofo 4,1%; Vatovavy fito Vinagny 3,9%.