Noverezin-jo ny filoha Zafy Albert

26/04/2013

Nandefa taratasy fangatahana fiara, amin’ny maha filoham-pirenena teo aloha azy, ny profesora Zafy Albert. Araka ny fantatra dia tsy sambany akory ityb filoham-pirenena teo aloha ity no nanao izany fangatahana izany tamin’ny fitondrana tetezamita kanefa tsy nisy tohiny hatrany izany fangatahana nataony izany. Fantatra ihany koa anefa etsy an-danin’izany fa maro tamin’ireo minisitra teo aloha tao anatin’izao tetezamita izao no tsy mety nanatitra ny fiara izay nampiasainy fony izy ireo teo amin’izany toerana izany. Antony ilazana fa voahosihosy tanteraka ny fahaiza-mitantana sy ny fanarahan-dàlana eto amintsika vokatr’ity tetezamita ity.

Gaboraraka ary tsy misy fanaraha-maso tanteraka ny fanarahana ny làlana manan-kery amin’ny fanomezana tombon-tsoa ireo izay tokony hahazo izany, rah any zava-misy amin’izao tetezamita izao no resahina. Ohatra mibaribary ny manjo ny filoha teo aloha, ny profesora Zafy Albert, izay manana ny zo feno amin’izay maha filoham-pirenena teo aloha azy izay. Araka ny fantatra anefa dia velon-taraina ity Ray aman-dreny ity satria natao tsinontsinona hatrany ny fangatahana napetrany tamin’ireo mpitondra isan’ambaratonga mahakasika ny fanomezana azy izany zo maha filoha teo aloha azy izay. Isan’ireny ny tokony hanomezana ary fiarakodia izay tsy mbola nataon’ny fitondrana tetezamita hatramin’izao ka nahatonga azy hanavao indray ny fangatahany. Nisy ary ny taratasy nalefan’ny profesora Zafy Albert any amin’ireo tompon’andrikitra samihafa toy ny filohan’ny tetezamita sy ny Praiminisitra lehiben’ny governemanta ary ny minisitry ny Vola mba hanomezana azy fiara amin’izay maha filoha teo aloha azy izay.
Gaboraraka
Mampatsiahy ny momba ny Amiraly Ratsiraka ihany koa ity tranga ity. Ny Amiraly Ratsiraka izay fantatra ihany koa fa tsy nahazo ireo tombontsoa tokony ho azony amin’izay maha filoham-pirenena teo aloha azy izay. Marihina anefa fa nomena izany ny vadin’ny filoha teo aloha raha vantany vao tonga teto amin’ny firenena taorian’ny fipetrahany tany Afrika Atsimo.
Tsara ny manamarika fa araka ny hitan’ny be sy ny maro dia maro amin’ireo minisitra na praiminisitra lefitra teo aloha tao anatin’izao fitondrana tetezamita izao no mbola tsy namerina ireo fitaovana, indrindra ny fiarakodia nomena azy noho izay maha mpikambana ao amin’ny governemanta azy izay hatramin’izao. Isan’izay ny minisitra teo aloha Virapin Ramamonjisoa izay mbola mampiasa ilay fiara Ford Mondeo miloko fotsy izay nomena hampiasaina fony izy minisitra. Isan’izany ihany koa ny minisitry ny vola teo aloha, Fihenena Richard izay mbola tsy namerina ny fiaram-panjakana nampiasaina hatramin’izao. Ankoatr’izay dia mbola tazana mitondra ny fiaram-panjakana nampiasainy ihany koa ny praiminisitra teo aloha Tehindrazanarivelo Alain. Marihina fa voafetran’ny lalana manan-kery ny fe-potoana hahafahana mitazona ireny fiaram-panjakana ireny aorian’ny fanesorana azy amin’ny toerany.
Gaboraraka arak’izany ny fitantanana ireny fiaram-panjakana ireny satria ireo izay tokony haahazo azy dia tsy mahazo fa ireo tsy tokony hahazo kosa no mitazona izany.